Kalyan News : कल्याण मध्ये आढळले मृत अर्भक; परिसरात उडाली खळबळ

डोंबिवली - कल्याण पश्चिमेतील पंचायत समितीच्या आवारात एक मृत अर्भक सापडले आहे. त्यामुळे परिसरात एकच खळबळ माजली आहे. पुरुष जातीचे, एक दिवसाचे हे अर्भक असून प्रसूतीनंतर अर्भकाला कपड्यात गुंडाळून रस्त्याच्या कडेला फेकून दिले असल्याचे स्थानिकांचे म्हणणे आहे.

विशेष म्हणजे, कल्याण डोंबिवली महानगरपालिकेचे रुक्मिणीबाई शासकीय रुग्णालय हाकेच्या अंतरावर असल्याने वेगवेगळ्या चर्चा आता सुरु झाल्या आहेत. दरम्यान कल्याण मधील महत्मा फुले चौक पोलीस ठाण्यात याची माहिती देण्यात आली असून, पोलीस घटनास्थळी पोहोचले आहेत. पोलिसांनी घटनेची नोंद करत याचा तपास सुरू केला आहे. मृत अर्भकाच्या मातेचा शोध पोलीस घेत असून त्यानंतरच याचा उलगडा होईल.