विक्रोळीत निर्जंतुकीकरण न करताच होतायत कोरोनाच्या मृतदेहांवर अंत्यसंस्कार; स्मशानभूमीजवळ राहणाऱ्या लोकांना कोरोनाच्या संसर्गाची भीती..

मुंबई: विक्रोळीच्या पूर्वेस असलेल्या स्मशानभूमीत अंत्यसंस्कारासाठी येणाऱ्या कोरोनाच्या मृतदेहाचे प्रमाण वाढले आहे. या स्मशानभूमीलगत झोपडपट्टी आहे. स्मशानभूमी परिसराचे निर्जंतुकीकरण होत नसल्याने या वस्तीतील नागरिकांमध्ये कोरोनाची भीती निर्माण झाली आहे. 

विक्रोळीच्या या स्मशानभूमीलगत टागोर नगर ग्रुप नंबर 7 इंदिरानगर या दाट वस्त्या आहेत. काही इमारती आणि चाळी आहेत. या स्मशानभूमीत धारावी, गोवंडी, मानखुर्द, घाटकोपर  आदी ठिकाणांहून मृतदेह अंत्यसंस्कारासाठी आणले जात आहेत. या ठिकाणी विद्युत दाहिनी असल्याने आता या स्मशानभूमीत आणल्या जाणाऱ्या मृतदेहाचे प्रमाण वाढले आहे.

हेही वाचा: सारखा मास्क लावल्याने आपणच उत्सर्जित केलेला कार्बनडायॉक्साईड घेतला जातो आणि होतोय हायपोक्सीया ?
 

इथे दररोज आठ ते दहा मृतदेह आणले जात आहेत. स्मशानभूमीच्या गेटवर रुग्णवाहिका थांबवून मृतदेह स्मशानभूमीत नेला जातो. रुग्णवाहिकेसोबत आलेले कर्मचारी स्मशानभूमीच्या बाहेर रेंगाळत असतात. आजूबाजूने त्या वस्त्यातील स्थानिक नागरिकांची ये-जा सुरू असते. अंत्यविधीनंतर त्या ठिकाणी निर्जंतुकीकरण केले जात नाही. त्यामुळे स्थानिक नागरिकांना कोरोनाचा संसर्ग होण्याची भीती वाटत आहे. 

विक्रोळीतल्या ६ जणांचा मृत्यू:

विक्रोळीच्या पूर्व भागातील टागोरनगर आणि कन्नमवार नगर भागात गेल्या पंधरा दिवसात 6 जणांचा मृत्यू कोरोनाने झाला आहे. कोरोनाचे रुग्ण या भागात वाढू लागल्याने नागरिकांमध्ये चिंतेचे वातावरण आहे. 

हेही वाचा: तळीरामांनी काढली कसर ! अवघ्या २४ तासात ५ हजार जणांना घरपोच मद्याची डिलिव्हरी.. 

"मुंबईच्या विविध भागातून विक्रोळीच्या स्मशानभूमीत कोरोनाचे मृतदेह आणले जात आहेत. स्मशानभूमीला लागून लोकवस्ती असल्याने कोरोनाचा मोठा धोका स्थानिकांना निर्माण झाला आहे. समशानभूमी परिसरात निर्जंतुकीकरण वारंवार केले जावे. पालिका आणि लोकप्रतिनिधींनी या गंभीर बाबींकडे लक्ष द्यावे", असं ज्येष्ठ सामाजिक कार्यकर्ते ज्ञानदेव ससाणे यांनी म्हंटलंय. 

deadbodies of corona patients burned withour sanitization in vikroli Cremation ground people are scared read full story