मुंबई : अंतिम वर्षाच्या अंतिम सत्राची परीक्षा रद्द करून विद्यार्थ्यांना सरासरी गुण देऊन निकाल जाहीर करण्याची घोषणा मुख्यमंत्री उद्धव ठाकरे यांनी केली होती. यावर राज्यपालांनी आक्षेप घेतल्यानंतर राज्य सरकारने या निर्णयाबाबत कायदेशीर मत मागविले. याविषयी गुरुवारी (ता.18) मुख्यमंत्री, उच्च व तंत्रशिक्षण मंत्री आणि राज्याचे महाधिवक्ता यांच्यात झालेल्या बैठकीत अव्यावसायिक अभ्यासक्रमांच्या परीक्षा न घेण्याचा निर्णय झाल्याचे सूत्रांनी सांगितले. या निर्णयाचा प्रस्ताव आता राज्य आपत्ती व्यवस्थापन विभागाकडे पाठविण्यात आला असून त्यांच्याकडून अंतिम निर्णय जाहीर होईल, असेही सूत्रांनी सांगितले.
कोरोनाच्या पार्श्वभूमीवर लागू करण्यात आलेल्या लॉकडाऊनमुळे शैक्षणिक संस्था बंद ठेवण्यात आल्या. यामुळे पदवीच्या अंतिम वर्षाच्या विद्यार्थ्यांच्या परीक्षा रखडल्या. या परीक्षांबाबत विद्यापीठ अनुदान आयोगाने मार्गदर्शक सूचना जाहीर केल्यानंतर राज्यातील विद्यापीठांच्या कुलगुरूंच्या समितीने अंतिम वर्षाच्या परीक्षा जुलैमध्ये घेण्याचा निर्णय घेतला. मात्र यानंतर मुख्यमंत्री ठाकरे यांनी अंतिम वर्षाची परीक्षा न घेता आतापर्यंतच्या सत्राच्या गुणांची सरासरी काढून गुणदान केले जाईल असे जाहीर केले.
या निर्णयाला राज्यपालांनी आक्षेप घेतला. तसेच विधी, अभियांत्रिकी, व्यवस्थापन, वैद्यकीय, आर्किटेक्चर या अभ्यासक्रमांसाठी व्यावसायिक परिषदाही मुख्यमंत्र्यांच्या या निर्णयाला अनुकुल नव्हत्या. परीक्षांबाबत देशभरात एकच निर्णय असावा अशी विनंती मुख्यमंत्री उद्धव ठाकरे यांनी पंतप्रधान नरेंद्र मोदी यांच्याकडे केली होती. यानंतर गुरुवारी झालेल्या या बैठकीत अव्यावसायिक अभ्यासक्रम अर्थात पारंपरिक बीए. बीकॉम आणि बीएसस्सीची पदवी अभ्यासक्रमांच्या परीक्षा न घेण्याचा निर्णय झाल्याचे सूत्रांकडून समजते.
तर व्यावसायिक अभ्यासक्रमांच्या परीक्षांचा निर्णय संबंधित अभ्यासक्रमाच्या परिषद ज्या प्रमाणे सांगतील त्या प्रमाणे घेण्यात यावा असेही ठरल्याचे सूत्रांनी सांगितले. राज्यात सध्या आपत्ती व्यवस्थापन कायदा लागू असल्यामुळे या निर्णयाचा प्रस्ताव राज्याच्या आपत्ती व्यवस्थापन विभागाकडे पाठविण्यात आला आहे. या विभागाकडून याबाबतचे अध्यादेश जारी होतील, असेही सूत्रांनी सांगितले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.