गर्व आहे मला अलिबागकर असल्याचा; माजी कसोटीपटू रवी शास्त्री यांची प्रतिक्रिया

अलिबाग : ३० वर्षांपूर्वी अलिबागमध्ये (Alibag) वास्तव्यास आलो. सध्या आवास- सासवणे येथे राहतो. या ठिकाणी शांतता आहे. त्यामुळे अलिबागकर असल्याचा अभिमान आहे, अशी प्रतिक्रिया माजी कसोटीपटू रवी शास्त्री (Ravi shastri) यांनी शनिवारी (ता. १२) व्यक्त केली. अलिबाग- रेवस मार्गावरील कनकेश्वर फाटा येथे लोकसहभागातून ‘चॅम्पियन ऑफ चॅम्पियन्स’ (Champion Of Champions sculpture ) हे रवी शास्त्री यांचे शिल्प तयार करण्यात आले आहे. त्याचे उद्‍घाटन करण्यात आले, त्याप्रसंगी ते बोलत होते.

कार्यक्रमाला सार्वजनिक बांधकाम मंत्री एकनाथ शिंदे, पालकमंत्री आदिती तटकरे, माजी राज्यमंत्री मीनाक्षी पाटील, आमदार महेंद्र दळवी, आमदार भरत गोगावले, माजी आमदार पंडित पाटील, माजी आमदार मनोहर भोईर, जिल्हा परिषद समाज कल्याण सभापती दिलीप भोईर, जिल्हा परिषद सदस्य आस्वाद पाटील, चित्रा पाटील, पंचायत समिती सदस्य समीहा पाटील आदी मान्यवर उपस्थित होते.

शास्त्री म्हणाले की, अलिबाग तालुक्यात मोठ्या प्रमाणात टेनिस क्रिकेट खेळले जाते. येथील खेळाडूंना चांगल्या पद्धतीने व्यासपीठ मिळाल्यास येथील खेळाडूंची आयपीएलसाठी निवड होऊ शकते. येथील वातावरण मानसिक व शारीरिक आरोग्यासाठी पोषक आहे.