रायगड पोलिसांसाठी अमेरिकन कंपनी धावली!

रायगड : कोरोनाविरुद्धच्या लढाईत महत्त्वाची भूमिका बजावणाऱ्या पोलिस अधिकारी आणि त्यांच्या कुटुंबीयांचे आरोग्य धोक्यात आले आहे. त्यांना औषधोपचाराबरोबरच मानसिक सल्ल्याची गरज असल्याने रायगड पोलिसांनी टेलिमेडिसीन सेवेचा आधार घेतला आहे. आता या सेवेतून पोलिस अधिकारी आणि त्यांच्या कुटुंबीयांना घरबसल्या आरोग्य सल्ला घेता येणार आहे.

ही बातमी वाचली का? आनंदाची बातमी; 1076 रुग्ण कोरोनामुक्त

पोलिसांची हीच गरज लक्षात घेऊन विनामूल्य टेलिमेडिसीन समुपदेशन सुविधा उपलब्ध करून देण्यात आली आहे. टेलिमेडिसीन समुपदेशन ही आजच्या काळातील लोकप्रिय अशी सुविधा आहे. ज्याद्वारे रुग्णांना कॉल अथवा व्हिडीओ कॉलिंगद्वारे डॉक्टरांशी थेट संवाद साधता येतो. फिगमॅड (FIGMD) प्रायव्हेट लिमिटेड ही अमेरिकेतील एक अग्रणी अशी संस्था आहे, जी रुग्णांना मोबाईल ॲपद्वारे अथवा हेल्पलाईन क्रमांकाद्वारे टेलिमेडिसीन समुपदेशन सुविधा पुरविते. ज्यात अमेरिकेतील तब्बल 60 टक्के डॉक्टर्स जोडले गेले आहेत. भारतातही त्यांच्यामार्फत तशी सुविधा सुरू करण्यात आली आहे आणि कोरोनाच्या पार्श्वभूमीवर कुठल्याही प्रकारची प्राथमिक लक्षणे आढळल्यास रायगड पोलिस दलातील अधिकारी, कर्मचारी व त्यांच्या कुटुंबीयांच्या आरोग्याच्या सुरक्षिततेकरिता विनामूल्य टेलिमेडिसीन समुपदेशन सुविधा 24 तास उपलब्ध करून देण्यात आली आहे.

ही बातमी वाचली का? नवी मुंबई आंतरराष्ट्रीय विमानतळाच्या कामाला सुरुवात 

या सुविधेअंतर्गत आरोग्य तपासणीसाठी हेल्पलाईन क्रमांकावर मिस कॉल दिल्यानंतर 45 मिनिटांच्या आत एका समन्वयकाद्वारे संपर्क साधला जातो. ज्यात आपल्या सोईनुसार तपासणीची वेळ ठरविण्यात येईल. ठरविलेल्या वेळेनुसार कॉल अथवा व्हिडीओ कॉलिंगद्वारे डॉक्टर आपल्याशी संपर्क साधतात. तज्ज्ञ डॉक्टरांच्या मार्गदर्शनाखाली ठरलेल्या वेळेनुसार संबंधित आजारावर व्हिडीओ कॉन्फरन्सिंगद्वारे समुपदेशन केले जाते. हे पोलिस कर्मचारी आणि त्यांच्या नातेवाइकांना मोफत आहे.
- सचिन गुंजाळ, अपर पोलिस अधीक्षक, रायगड.