Ganesh Chaturthi 2022 : चिंचपोकळीच्या चिंतामणीचे भव्य आगमन

शिवडी : गिरणगावातील १०३ व्या वर्षात पदार्पण करणाऱ्या चिंचपोकळी सार्वजनिक उत्सव मंडळाच्या ‘चिंचपोकळीचा चिंतामणी’ या नावाने प्रसिद्ध असणाऱ्या गणेशाचे शनिवारी (ता. २७) सुप्रसिद्ध मूर्तिकार रेश्मा खातू यांच्या चिंचपोकळी येथील कार्यशाळेतून ढोल-ताशांच्या गजरात मोठ्या उत्साहात आणि गणपती बाप्पा मोरयाचा जागर करीत आगमन झाले. या आगमन सोहळ्यास भक्तांचा सागर लोटला होता.

भक्तांमध्ये प्रचंड उत्साह पाहायला मिळाला. चिंचपोकळीचा पूल धोकादायक असल्याने पुलावर गर्दी करू नये, असे आवाहन करण्यात आले होते. त्या अनुषंगाने मंडळाने कार्यकर्त्यांची फौज उभारली होती. गर्दीत एका मुलाला त्रास होऊ लागल्‍यावर अम्ब्युलन्समधून रुग्‍णालयात नेण्यात आले. लाईव्ह दर्शनाची सोयदेखील केली होती. या आगमनावेळी एक अम्ब्युलन्स आली असता कार्यकर्त्यांनी आणि पोलिसांनी तिला गर्दीतून वाट काढून दिली.

गणेशभक्तांना दिवसभर गर्दीचा त्रास

मुंबई :अवघ्या तीन दिवसांवर गणेशोत्सव येऊन ठेपला आहे. बाप्पाच्या आगमनाची अंतिम तयारी करण्यासाठी शनिवारी मोठ्या प्रमाणात नागरिक घराबाहेर पडले होते. त्यामुळे मध्य आणि पश्चिम रेल्वेच्या प्रमुख स्थानकांवर गर्दी उसळली होती. त्यातच त्यात सकाळी सीएसएमटीकडे येणाऱ्या लोकल सेवा १५ ते २० मिनिटे उशिराने धावत असल्याने प्रवाशांना दिवसभर लोकलचा गर्दीतून प्रवास करावा लागला आहे. खरेदीसाठी अखेरचा शनिवार दिवस असल्याने मोठ्या प्रमाणात नागरिक घराबाहेर पडले होते. त्यामुळे दादर, लालबाग, क्रॉफर्ड मार्केट, विलेपार्ले बाजारपेठांमध्ये गणेशभक्तांची मोठी गर्दी उसळली होती.

मेगाब्लॉक रद्द

प्रवाशांची गैरसोय होऊ नयेत म्हणून मध्य आणि पश्चिम रेल्वेने रविवारचा नियमित घेण्यात येणारा मेगाब्लॉक रद्द केला आहे. रविवारी मेगाब्लॉक असल्याच्या भीतीने अनेक प्रवासी शनिवारी घराबाहेर पडले होते. परिणामी, प्रवाशांना लोकलच्या गर्दीचा सामना करावा लागला आहे.