'ती' बंद करायला विसरली; अन् त्याने...

नवी मुंबई : एका तरुणीच्या जीमेलच्या माध्यमातून परिचयातील व्यक्तीने, तिचे स्नॅप चॅट हॅक करून खासगी फोटो व व्हिडीओ डाऊनलोड केल्याचे उघडकीस आले आहे. याबाबत संबंधित तरुणीने वेळीच पोलिसांत तक्रार केल्याने तिचे खासगी फोटो व व्हिडीओ समाज माध्यमावर प्रसारित होण्यापासून वाचले आहे. अशा प्रकारच्या घटनांत दिवसेंदिवस वाढ होत असल्याने सोशल नेटवर्किंग साईटचा वापर करताना प्रत्येक व्यक्तीने काळजी घेणे आवश्‍यक आहे, असे आवाहन नवी मुंबई पोलिसांच्या सायबर सेलकडून करण्यात आले आहे. 

ही बातमी वाचली का? झाकण चोर अटकेत, दुर्गंधी मिटली..

पीडित तरुणी महाविद्यालयीन विद्यार्थिनी असून काही महिन्यांपूर्वी तिच्या ओळखीतल्या व्यक्तीच्या लॅपटॉपचा तिने आपल्या कामासाठी वापर केला होता. त्या वेळी या व्यक्तीच्या लॅपटॉपवर आपले जीमेल अकाऊंट लॉगईन केले होते; मात्र काम संपल्यानंतर तिने लॉगआऊट केले नव्हते. त्यामुळे त्या व्यक्तीने याचा गैरफायदा घेत तरुणीच्या स्नॅप चॅट खात्याचा पासवर्ड बदलला. त्यानंतर त्याने तरुणीच्या स्नॅप चॅटमध्ये एक्‍सेस मिळवून तरुणीचे खासगी फोटो व व्हिडीओ डाऊनलोड केले. यानंतर आपले स्नॅपचॅट कुणी तरी हॅक केल्याचा तरुणीला संशय आल्याने तिने नवी मुंबई पोलिसांच्या सायबर सेलकडे तक्रार केली. त्यानुसार सायबर सेलने तांत्रिक तपासाद्वारे शोध घेतला असता पीडित तरुणीच्या परिचयातील व्यक्तीनेच तीचे खासगी फोटो व व्हिडीओ डाऊनलोड केल्याचे तपासात निष्पन्न झाले आहे. 

ही बातमी वाचली का? कुणी मेमरी कार्ड देतं का मेमरी कार्ड

अशा घटनांमध्ये दिवसेंदिवस वाढ होत आहे. त्यामुळे सोशल नेटवर्किंग साईटचा वापर करताना प्रत्येक व्यक्तीने काळजी घ्यावी. तसेच कॉम्प्युटर, लॅपटॉप किंवा मोबाईलवर सोशल नेटवर्किंग साईट व ई-मेल लॉग इन केल्यानंतर ते न विसरता लॉग आऊट करणे अत्यंत गरजेचे आहे. 
- प्रवीणकुमार पाटील, पोलिस उपायुक्त, गुन्हे शाखा.