Andheri Election : अंधेरीच्या पोटनिवडणुकीत नवा ट्विस्ट? 'या' उमेदवाराचा उद्धव ठाकरेंच्या सेनेवर गंभीर आरोप

Andheri East By-Election : अंधेरी पोटनिवडणुकीतून भाजपनं (BJP) माघार घेतलीय. या निवडणुकीत दिवंगत आमदार रमेश लटके यांच्या पत्नी ऋतुजा लटके आणि भाजपचे मुरजी पटेल यांच्यात मुकाबला होणार होता. भाजप प्रदेशाध्यक्ष चंद्रकांत बावनकुळे (Chandrakant Bawankule) यांनी यासंदर्भात माहिती दिली. भाजपचे उमेदवार मुरजी पटेल अर्ज मागे घेतील, असं त्यांनी सांगितलं. मात्र, आता अंधेरी पोटनिवडणुकीत नवा ट्विस्ट पहायला मिळतोय.

आता एका अपक्ष उमेदवारानं उद्धव ठाकरेंच्या (Uddhav Thackeray) शिवसेनेवर (Shiv Sena) गंभीर आरोप केलेत. अंधेरी पूर्वच्या पोटनिवडणुकीत अपक्ष उमेदवारांवर माघार घेण्यासाठी दबाव आणला जात होता, असा दावा अपक्ष उमेदवार मिलिंद कांबळे (Milind Kamble) यांनी शिवसेना उद्धव बाळासाहेब ठाकरे (Shiv Sena Uddhav Balasaheb Thackeray) या पक्षावर केला आहे. तसंच याबाबत मिलिंद कांबळेंनी निवडणूक आयोगाला (Election Commission) एक पत्र लिहून तक्रारही दाखल केलीय.

ऋतुजा लटकेंच्या सहकाऱ्यांवर गंभीर आरोप

ऋतुजा लटके (Rutuja Latke) यांच्यासोबत असलेले सहकारी मला धमकी देत होते, असा खळबळजनक दावा कांबळे यांनी केला आहे. या पोटनिवडणुकीतील मतदानाला काही दिवस बाकी असताना अपक्ष उमेदवारानं ऋतुजा लटके यांच्या सहकाऱ्यांवर गंभीर आरोप करत तक्रार केल्यानं आता निवडणूक आयोग काय भूमिका घेते, हे पाहणं महत्त्वाचं ठरणार आहे.

अंधेरी पूर्व विधानसभा मतदारसंघात 3 नोव्हेंबरला मतदान

अंधेरी पूर्व विधानसभा मतदारसंघात येत्या 3 नोव्हेंबरला होणाऱ्या पोटनिवडणुकीसाठी प्रशासनाची सर्व तयारी पूर्ण झाली असल्याची माहिती जिल्हाधिकारी निधी चौधरी यांनी बुधवारी दिली. सकाळी 7 ते संध्याकाळी 6 वाजेपर्यंत मतदानाची वेळ असून निवडणूक शांततेत आणि निष्पक्षपणे पार पडेल, असा विश्वास त्यांनी व्यक्त केला आहे.