पनवेल : आवाज आणि चित्र अचानक गायब होणे... अधिकारी आणि नगरसेवक यांच्यातील बोलण्यात ताळमेळ न जुळणे... अशा अनेक प्रकारच्य गोंधळामुळे पनवेल महापालिकेची आज झालेली सर्वसाधारण सभा चर्चेची ठरली. अखेर पुढील वेळी सभा ऑनलाईन न घेता सोशल डिस्टन्सिंग राखत पालिकेच्या सभागृहातच घेण्याची मागणी नगरसेवक प्रकाश बिनदार यांनी केली. विरोधकांनीही त्यांच्या मागणीला पाठिंबा दिला. कोरोनामुळे तब्बल पाच महिन्यानंतर ऑनलाईन सभा आयोजित केली होती.
महापालिकेच्या आद्य क्रांतिवीर वासुदेव बळवंत फडके नाट्यगृहातील सभागृहात ऑनलाईन सभा महापौर डॉ. कविता चौतमोल, आयुक्त सुधाकर देशमुख, उपमहापौर जगदीश गायकवाड, उपायुक्त संजय शिंदे, सभागृह नेते परेश ठाकूर, विरोधी पक्षनेते प्रीतम म्हात्रे आदी उपस्थित होते. ऑनलाईन सभा असल्याने अनेक नगरसेवक घरातूनच सभेला उपस्थित होते. या वेळी संवाद चांगल्या प्रकारे साधता यावा, यासाठी सभागृहात मोठा पडदा लावण्यात आला होता. मात्र या पडद्यावरून चित्र अचानक गायब होणे, आवाजात व्यत्यय अशा समस्या निर्माण झाल्या. हा गोंधळ तापदायक झाल्याने नगरसेवकांनी पुढील सभा डिस्टन्सिंग राखत आयोजित करण्याची मागणी केली.
नगरसेवक निधी न मिळाल्याने नाराजी
सर्वसाधारण सभेत झालेल्या चर्चेत नगरसेवक निधी म्हणून मंजुरी देण्यात आलेला 1 लाख रुपयांचा निधी नगरसेवकांना अद्याप मिळाला नाही. याबाबत शेकाप नगरसेवक अरविंद म्हात्रे यांनी नाराजी व्यक्त केली. म्हात्रे यांनी कोव्हिडवर नियंत्रण मिळवण्यासाठी पालिकेकडून काय उपाययोजना राबवल्या आहेत, याबाबत तपशील देण्यात यावा, अशी मागणी केली. म्हात्रे यांच्या प्रश्नावर उत्तर देताना कोव्हिड संसर्ग नियंत्रणात आणण्यासाठी प्रशासन सवतोपरी प्रयत्न करत असल्याची माहिती पालिकेकडून देण्यात आली. पालिकेने कोव्हिड संसर्ग रोखण्यासाठी आतापर्यंत केलेल्या 9 कोटी 86 लाख 40 हजाराचा तपशीलवार खर्च तत्काळ देणार असल्याची माहिती नगरसेवक म्हात्रे यांच्या प्रश्नावर दिली.
नगरसेवकांच्या घरगुती चर्चा
ऑनलाईन सर्वसाधारण सभेत बोलण्याची संधी देण्यात आलेल्या सदस्यांव्यतिरिक्त इतरांनी मोबाईल म्यूट मोडवर ठेवणे अपेक्षित होते; मात्र याबाबत माहिती नसलेल्या अनेक सदस्यांनी आवाज बंद न केल्याने सदस्यांच्या घरात सुरू असलेल्या चर्चा, लहान मुलांच्या खेळण्याचे आवाज सभागृहाला ऐकू येत होते.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.