Maharashtra Accident News: राज्यभरातील रस्ते अपघातात मृत्यूमुखी पडणाऱ्यांची संख्या झाली कमी

राज्यभरातील रस्ते अपघातात मृत्यूमुखी पडणाऱ्यांची संख्या कमी करण्याचे राज्य सरकारने उद्दिष्ट ठरवले होते. यात जिल्ह्यांमध्ये मुंबई शहर आणि उपनगर जिल्हा प्रथम, चंद्रपूर जिल्हा द्वितीय तर नवी मुंबई शहराने तिसरा क्रमांक पटकावला आहे.

परिवहन विभागातर्फे राज्य रस्ता सुरक्षा अभियान २०२४ चा उद्घघाटन सोहळा मुंबईत पार पाडला. यावेळी सार्वजनिक बांधकाम मंत्री दादाजी भुसे आणि शालेय शिक्षण मंत्री दीपक केसरकर यांच्याहस्ते नवी मुंबईच्या वाहतूक विभागाचे पोलिस उपायुक्त तिरुपती काकडे आणि उप-प्रादेशिक परिवहन अधिकारी हेमांगिनी पाटील यांचा सन्मानचिन्ह, प्रमाणपत्र देऊन गौरवण्यात आले.

नवी मुंबई शहरात पोलिस विभाग, महापालिका, सिडको, प्रादेशिक परिवहन कार्यालय आणि सार्वजनिक बांधकाम विभागाने रस्त्यावरील ब्लॅक स्पॉट (वारंवार अपघात होणारे ) अपघातप्रवण क्षेत्रांचे सर्वेक्षण, तपासणी आणि अभ्यास करून, त्यातील त्रुटी शोधून काढून आवश्यक ते बदल करून अपघात संख्या कमी करण्यासाठी विशेष प्रयत्न केले.

त्याचा परिणाम म्हणून नवी मुंबई शहरातील तुलनेत अपघातात मृत्यूमुखी पडणाऱ्यांची संख्या ही १७.७ टक्क्यांनी कमी झाली आहे. जानेवारी ते नोव्हेंबर २०२३ या वर्षात ही आकडेवारी असून नवी मुंबई विभाग तिसऱ्या क्रमांकावर आहे.