रात्री ८.३० वाजता मुख्यमंत्री उद्धव ठाकरे काय निर्णय जाहीर करणार?

मुंबई - राज्यात कोरोना रुग्णांची संख्या वाढत आहे. या वाढत्या रुग्णसंख्येवर नियंत्रण मिळवण्यासाठी राज्यात पुन्हा एकदा लॉकडाउन लावला जाण्याची दाट शक्यता आहे. महाराष्ट्रातील काही जिल्ह्यांमध्ये आधीच लॉकडाउन लावण्यात आला आहे. आता पुण्यातही निर्बंध कडक करण्यात आले आहेत. रविवारपासून पुढील सात दिवसांसाठी पुण्यात काही सेवा पूर्ण बंद ठेवण्याचे आदेश दिले आहेत. विभागीय आयुक्तांनी याची माहिती दिली. 

राज्याचे मुख्यमंत्री उद्धव ठाकरे पाच वाजता अधिकाऱ्यांसोबत एक महत्त्वाची बैठक करणार आहेत. या बैठकीत काही महत्त्वाचे निर्णय होऊ शकतात. त्यानंतर रात्री ८.३० वाजता मुख्यमंत्री सोशल मीडियावरुन राज्यातील जनतेशी संवाद साधतील. मुख्यमंत्री काय बोलणार? काय निर्णय घेणार? याकडे सगळ्यांचे लक्ष लागले आहे. 

फेब्रुवारीच्या तुलनेत मार्चमध्ये मुंबईत ४७५ टक्के कोरोना रुग्णवाढ

लॉकडाउन कोणालाच नकोय. कारण लॉकडाउनमुळे मोठ्या प्रमाणावर आर्थिक नुकसान होते, बेरोजगारी वाढते. काही राजकीय पक्षांनी लॉकडाउनला विरोध दर्शवलाय. शिवसेनेसोबत सत्तेमध्ये सहभागी असलेला काँग्रेस आणि राष्ट्रवादी काँग्रेस पक्षही लॉकडाउनसाठी अनुकूल नाहीय. तसे त्यांनी संकेतही दिले आहेत. तरीही आज निर्बंधांच्या नावाखाली मिनी लॉकडाउनचा निर्णय घेतला जाऊ शकतो.