पाच वर्षांच्या मुलीला मेणबत्तीचे चटके 

नवी मुंबई - कळंबोली सेक्‍टर-14 मधील महिलेने पोटच्या पाच वर्षांच्या मुलीला मेणबत्तीचे चटके देऊन तिचा अमानुष छळ केल्याचा धक्कादायक प्रकार उघडकीस आला आहे. विशेष म्हणजे या घटनेतील मुलीच्या चुलतीनेही चटके देताना तिचे हात पकडल्याचे उघडकीस आले आहे. यात मुलीच्या सर्वांगावर चटके दिल्यामुळे भाजल्याच्या जखमा आहेत. या घटनेनंतर पोलिसांनी मुलीच्या आईसह तिच्या चुलतीलाही अटक केली आहे. 

साक्षी यादव असे मुलीचे नाव असून ती आई-वडील व भावंडासह कळंबोलीतील रोडपाली येथील विनायक सोसायटीत राहते. तिचे वडील घनश्‍याम व भाऊ धनंजय भाजी विक्रीचा व्यवसाय करतात. या दोघा भावांची पाच लहान मुले आहेत. या सगळ्यांमध्ये साक्षी मोठी असल्याने व ती जास्त मस्ती करत असल्याने आई व चुलती तिला चटके देत होत्या. मंगळवारी दुपारीही अनिताने साक्षीला बेदम मारहाण करून मेणबत्तीचे चटके दिले. या वेळी साक्षीची चुलती रिंकीने तिचे हात पकडून ठेवले होते. याची माहिती पोलिसांना मिळताच त्यांनी दोघींना अटक केली.