Mumbai Local : एसी लोकलमध्ये तांत्रिक बिघाड! मध्य रेल्वेची वाहतूक ठप्प

मुंबई - मध्य रेल्वेच्या कोपर स्थानकात अंबरनाथ-सीएसएमटी वातानुकूलित जलद लोकलमध्ये शनिवारी रात्री ८.२० च्या सुमारास बिघाड झाला होता. परिणामी, जलद मार्गावरील मेल-एक्स्प्रेससह जलद लोकल फेऱ्या धीम्या मार्गावर वळवण्यात आल्या. मध्य रेल्वेच्या रेल्वे वाहतुकीचे तीन तेरा वाजले आहे.

कोपर स्थानकात अंबरनाथ-सीएसएमटी वातानुकूलित जलद लोकलमध्ये शनिवारी रात्री ८.२० च्या सुमारास बिघाड झाला होता. यामुळे रेल्वे स्थानकात प्रवाशांची प्रचंड गर्दी झाली होती. तसेच, इतर लोकल इच्छित स्थानकात ३० ते ४५ मिनिटे उशिराने पोहचत होत्या. तसेच, अनेक लोकल रद्द करण्यात आल्याने एका लोकलमध्ये दोन ते तीन लोकलमधील प्रवाशांची गर्दी जमली होती.

दरम्यान, रात्री १०.३० च्या सुमारास रिकामी वातानुकूलित लोकल मार्गावरून हटवून कारशेडमध्ये नेण्यात आली. तसेच जलद मार्गावरील लोकल सेवा सुरळीत करण्यात आली. मात्र, जलद मार्गावरील वाहतूक जवळपास दोन तास खोळंबल्याने लोकलचे वेळापत्रक पूर्णपणे कोलमडले होते. कामावरून घरी जाणाऱ्या प्रवाशांचे प्रचंड हाल झाले आहे.