Taxi Driver Crime : पाच महिन्यात ७५९ टॅक्सी चालकांवर भरारी पथकाची कारवाई

मुंबई - प्रादेशिक परिवहन अधिकारी ताडदेव कार्यालयाच्या वतीने मध्य मुंबईत मोटार वाहन कायद्यांतर्गत नियम मोडणाऱ्या टॅक्सी चालकांवर कारवाई मोहीम हाती घेतली आहे. यामध्ये सप्टेंबर ते जानेवारी या पाच महिन्यात सुमारे ७५९ टॅक्सी चालकांवर विविध गुन्ह्यात कारवाई करण्यात आली आहे. यामध्ये दोन लाख ४० हजार रुपयांची दंड वसुली करण्यात आली आहे. यामध्ये धक्कादायक म्हणजे यापैकी ७१५ गुन्हे भाडे नाकारणाऱ्या टॅक्सी चालकांचे असल्याची माहिती मध्य मुंबईचे प्रादेशिक परिवहन अधिकारी भरत कळसकर यांनी दिली आहे.

मुंबईत टॅक्सी चालकांकडून दैनंदिन वाहतूक नियमांची पायमल्ली केली जात असून, यामध्ये भाडे नाकारण्याचे प्रमाण सर्वाधिक आहे. पाच महिन्यात मध्य मुंबई आरटीओ कार्यालयातील भरारी पथकाने अशा टॅक्सी चालकांच्या विरुद्ध नागरिकांनी केलेल्या तक्रारीवर कारवाई करण्यात आली असून, ज्यामध्ये ७१५ गुन्हे भाडे नाकारणे, जादा भाडे वसुली ३५ तर प्रवाशांना वाईट वागणूक देण्याच्या ९ घटना घडल्या असून, अशा एकूण ७५९ तक्रारी भरारी पथकाकडे दाखल झाल्या असून, त्यापैकी १७० तक्रारी ऑन स्पॉट सोडवण्यात आल्या आहे. तर ५८९ तक्रारी अद्याप प्रलंबित असल्याची माहिती कळसकर यांनी दिली आहे.