Mumbai News : हौसेला मोल नाही! मुलगा २ वर्षांचा अन् बर्थडे केक तब्बल २२१ किलोंचा

हौसेला मोल नसतं,हेच खरं! अशीच एक गोष्ट वसईमधून समोर आली आहे. वसईत हौशी पालकांनी आपल्या सहा वर्षांच्या मुलासाठी भलामोठा केक आणला आहे. हा केक दोन चार नव्हे तर तब्बल २२१ किलो वजनाचा आहे.

वसईतल्या कामण इथल्या डोंगरी भागामध्ये राहणाऱ्या नवीन आणि शुभांगी भोईर यांनी आपला मुलगा रियांश याच्या वाढदिवसानिमित्त हा केक आणला आहे. रियांश सध्या दोन वर्षांचा आहे. लग्नाच्या सहा वर्षांनंतर रियांशचा जन्म झाला. तसंच जन्मानंतर जवळपास एक महिनाभर तो एनआयसीयूमध्ये उपचार घेत होता. त्यामुळे या दाम्पत्याने रियांशला लाडाकोडात वाढवलं आहे.

त्याच निमित्ताने भोईर दाम्पत्याने रियांशच्या आवडीची फोर व्हीलर 'वरना'चा हुबेहुब केक बनवला आहे. हा केक २२१ किलो वजनाचा आहे. केक इंडस्ट्रीमध्ये पहिल्यांदाच असा भव्यदिव्य केक बनवण्यात आला आहे. रियांशच्या पहिल्या वाढदिवसाला या दाम्पत्याने त्याच्यासोबत हेलिकॉप्टरमधून एन्ट्री घेतली होती.

मॉन्जिनीज या कंपनीने हा भव्यदिव्य केक बनवला आहे. रियांश आमच्यासाठी देवाचं गिफ्ट आहे. म्हणूनच आम्ही त्याच्या वाढदिवसाला वेगळं काहीतरी करण्याचा प्रयत्न करत असतो, अशी प्रतिक्रिया रियांशचे वडील नवीन भोईर यांनी दिली आहे.