Mumbai Local News: गोरेगाव जलद लोकल रद्द करण्याचा घाट; महिला प्रवाशांनी राबविली स्वाक्षरी मोहीम!

Mumbai Local News: एसी लोकल सुरू झाल्यावर रेल्वेने मध्य आणि पश्चिम सामान्य अनेक लोकलच्या फेऱ्या रद्द केल्या. त्यावरून पश्चिम आणि मध्य रेल्वेला प्रवाशांच्या रोषाला सामोरे जावे लागले.

त्यात आता पश्चिम रेल्वे प्रशासनाने उपनगरीय मार्गावरून सकाळी वर्दळीच्या वेळी गोरेगाव येथून सकाळी सुटणारी ९.५३ लोकल रद्द करण्याचा घाट घातला आहे. त्यामुळे लोकलमधून प्रवास करणाऱ्या प्रवाशांनी तीव्र नाराजी व्यक्त केली आहे. ही लोकल सुरू ठेवावी यासाठी विशेषतः महिला प्रवाशांनी लोकलमध्ये स्वाक्षरी अभियान राबविले आहे.

विरार, बोरीवली येथून चर्चगेटच्या दिशेने सर्वाधिक जलद लोकल धावतात. या जलद लोकल मधल्या मार्गावर थांबत नाही. त्यात बोरिवलीहुन सुटणाऱ्या सेमी फास्ट लोकल या बोरिवली ते मालाड दरम्यान पूर्णपणे प्रवाशांनी भरून गोरेगावला येतात.

त्यामुळे गोरेगावकर प्रवाशांना लोकलमध्ये चढायलाही जागा मिळत नाही. काही प्रवासी नाईलाजाने मग लोकलमधून पायरीवर उभे राहून प्रवास करतात. गोरेगावकर प्रवाशांच्या या समस्या लक्षात घेता तत्कालीन खासदार गजानन कीर्तिकर यांनी सतत रेल्वे प्रशासनाशी पाठपुरावा करून त्यावेळी गोरेगावहुन सुटणाऱ्या जलद लोकल सेवा सुरू केल्या होत्या.

गेल्या १० ते १२ वर्षांहून अधिक काळ गोरेगावहुन सकाळी वर्दळीच्या वेळी ८. २७ पासून अर्धा तासाच्या अंतराने ९.५३ पर्यँत चार जलद लोकल सेवा सुरू आहे.या लोकलमध्ये मालाड ते दहिसर मार्गावरीलही अनेक प्रवासी उभ्याने चर्चगेटपर्यंतचा इतर लोकलने प्रवास करू नये म्हणून या गोरेगाव जलद लोकलने प्रवास करतात.

या सर्व लोकल गोरेगाव नंतर जोगेश्वरी येथून पूर्णपणे प्रवाशांनी भरल्या जातात.असे असताना पश्चिम रेल्वेने ९.५३ ची लोकल बंद करण्याचा घाट घातल्याने प्रवाशांनी नापसंती व्यक्त करत तीव्र नाराजी व्यक्त केली आहे.