Mumbai News : वडाळा स्थानकात सिग्नल यंत्रणेत बिघाड!

मुंबई : वडाळा रेल्वे स्थानकात सिग्नल यंत्रणे ऐन गर्दीच्या वेळी झालेल्या तांत्रिक बिघाडामुळे हार्बर वाहतुकीचे तीन-तेरा वाजले. त्यामुळे आठवड्याच्या पहिल्याच दिवशी कामावरून घरी जाणाऱ्या रेल्वे प्रवाशांचे हाल झाले आहे.

मध्य रेल्वेने दिलेल्या माहितीनुसार, सोमवारी (ता.११) संध्याकाळी ७.४१ वाजण्याच्या सुमारास वडाळा स्थानकातील प्लॅटफॉर्म क्रमांक १ आणि २ वरील सिग्नल यंत्रणेत तांत्रिक बिघाड झाला. त्यामुळे सिग्नल यंत्रणा पुर्णपणे ठप्प पडली होती. त्यामुळे सीएसएमटी ते कुर्ला रेल्वे स्थानका दरम्यानची लोकल वाहतुक पुर्णपणे ठप्प झाली.

परिणामी लोकलच्या एका मागोमाग एक रांगा लागल्याने गाड्या खोळंबल्या होत्या. त्यामुळे लोकल गाड्यामध्ये प्रवासी अडकून पडले होते. या घटनेची माहितीने मिळताच मध्य रेल्वेचे अभियांत्रिकी पथक घटना स्थळी दाखल झाले.

अवघ्या १५ मिनिटात सिग्नल बिघाड दुरुस्त करण्यात आलेला आहे. मात्र ही घटना पीक अवर्स मध्ये घडल्याने प्रवाशांचे मोठे हाल झालेले आहे. हार्बर लोकलमध्ये अडकलेल्या काही प्रवाशांनी खाली उतरुन रुळामधून चालत जाऊन जवळचे स्थानक गाठत असल्याचे चित्रही दिसून आले आहे. विशेष म्हणजे घटनेमुळे हार्बर मार्गावरील अनेक लोकल सेवा विलंबाने धावत आहे.