फेरीवाला धोरणाच्या अंमलबजावणीला वेग 

फेरीवाला धोरणाच्या अंमलबजावणीला वेग 

मुंबई - फेरीवाला धोरणाच्या अंमलबजावणीसाठी आता पालिकेची यंत्रणा कामाला लागली आहे. मुंबईतील फेरीवाल्यांसाठी 85 हजार 891 जागा निश्‍चित करण्यासाठी हरकती, सूचना मागवण्यात आल्या असून येत्या आठवडाभरात फेरीवाल्यांची पात्र-अपात्रता निश्‍चित करण्याचे काम सुरू होईल, अशी माहिती पालिकेतील सूत्रांनी दिली. 

अनेक वर्षांपासून फेरीवाल्यांचा भिजत पडलेला प्रश्‍न एकदाचा मार्गी लागत आहे. फेरीवाल्यांना बसण्यासाठी पालिकेने 85 हजार 891 जागा निश्‍चित केल्या आहेत. या जागा अंतिम करण्यासाठी पालिकेने नागरिकांकडून हरकती आणि सूचना मागविल्या आहेत. ही प्रक्रिया पूर्ण झाल्यानंतर जागांबाबतचा निर्णय होणार आहे. यापूर्वी अर्ज केलेल्या फेरीवाल्यांचे कागदपत्रे तपासून त्यांच्या आधारे पात्रता निश्‍चित करण्यात येणार आहे. निश्‍चित केलेल्या जागांबाबत हरकती, सूचना मागवण्यात आल्या आहेत. त्याची मुदत 31 जानेवारीपर्यंत आहे. हे काम सुरू असतानाच फेरीवाल्यांची पात्र-अपात्रता निश्‍चित केली जाईल. 

एलफिन्स्टन रोड दुर्घटनेनंतर मुंबईतील फेरीवाल्यांचा प्रश्न ऐरणीवर आला. मनसेने फेरीवाला हटाव मोहीम सुरू केली. त्यानंतर पालिकेनेही फेरीवाल्यांवरील कारवाई तीव्र केली. या कारवाईनंतर फेरीवाला धोरणाच्या अंमलबजावणीला वेग आला आहे. त्यासाठी टाऊन वेंडिंड कमिटीची स्थापना करून फेरीवाल्यांची पात्र-अपात्रता निश्‍चित करावी, हॉकर्स-नॉन हॉकर्स झोन तयार करावे, ही मागणी जोर धरू लागली. 

टाऊन वेंडिंग कमिटी नियुक्त 
फेरीवाला धोरणासाठी 20 जणांची टाऊन वेंडिंग कमिटी नियुक्त करण्यासाठी पालिकेने जाहिरात देऊन अर्ज मागवले होते. यात पाच सरकारी अधिकारी, संस्था-मंडळे यांचे सात सदस्य अशा 12 जणांची समिती नियुक्त केली असून राज्य सरकारने याला मंजुरी दिली आहे. यात फेरीवाल्यांमधून आठ जणांना नियुक्त करणे आवश्‍यक आहे. फेरीवाल्यांची पात्र-अपात्रता निश्‍चित झाल्यावर त्यांची नियुक्ती केली जाणार असल्याची माहिती पालिकेच्या सूत्रांनी दिली.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com