24 पर्यंत अटक न करण्याचे निर्देश; बिल्डर अविनाश भोसले यांना मुंबई उच्च न्यायालयाकडून तूर्तास दिलासा

मुंबई: ईडीच्या रडारवर आलेले पुण्यातील बिल्डर अविनाश भोसले यांना आज मुंबई उच्च न्यायालयाने तूर्तास दिलासा दिला आहे. येत्या ता 24 पर्यंत त्यांना अटक न करण्याचे निर्देश न्यायालयाने ईडिला आज दिले.

बांधकाम व्यावसायिक भोसले आणि त्यांचा मुलगा अमीत यांच्याविरोधात अमंलबजावणी संचालनालयाने गुन्हा दाखल केला आहे. परकीय चलन व्यवस्थापन कायद्याच्या (फेमा) अंतर्गत आणि मनी लॉन्डरिंगच्या आरोपात हा गुन्हा नोंदविण्यात आला आहे. तसेच त्यांना चौकशीला हजर राहण्यासाठी समन्सही बजावण्यात आला आहे.

महत्त्वाची बातमी : सुशांतच्या बहिणींविरोधातील याचिकेवर मुंबई उच्च न्यायालयाकडून सुनावणी; दिला महत्त्वाचा निकाल

गुन्हा रद्द करण्यासाठी आणि समन्सच्या विरोधात भोसले यांनी शुक्रवारी याचिका दाखल केली होती.   याचिकेवर न्यायालयाने अंतरिम निर्देश दिले असून दोघांना दिलासा दिला आहे. मात्र 17 तारखेला ED चौकशीला हजर राहण्याचे आदेश न्यायालयाने दिले आहेत. याचिकेवर न्या. एस एस शिंदे आणि न्या. मनीष पितळे यांच्या खंडपीठापुढे  सुनावणी झाली. ईडीला याचिकेवर लेखी बाजू मांडण्याचे निर्देश न्यायालयाने दिले. 

महत्त्वाची बातमी : जेंव्हा नेमकं कुठे जायचं हा प्रश्न भेडसावत होता, तेंव्हा मदतीला उभं राहिलेलं 'मसीना'

पुणे, मुंबई आणि कोल्हापूरमध्ये प्रवर्तक एबीआयएल समूह लोकप्रिय आहे. बांधकाम क्षेत्रात विविध प्रकल्प त्यांनी पूर्ण केले आहेत. ईडीने मागील काही दिवसांत त्यांच्या कार्यालयांमध्ये छापे टाकले होते.
ईडीने आमच्यावरील आरोपांची माहिती आणि पूर्वसूचना न देता कार्यालयांवर छापे टाकले आहेत. आम्ही सर्व प्रकारे चौकशीला सहकार्य करायला तयार आहोत, त्यामुळे कठोर कारवाई करण्यास ईडीला मनाई करावी, अशी मागणी भोसले यांनी याचिकेत केली आहे. तसेच चौकशीला स्थगिती देण्याची मागणीही करण्यात आली. 

mumbai high court gives relief to builder bhosale no immediate arrest will be done by ED