Mumbai-Pune Expressway: मुंबई-पुणे एक्सप्रेस वे वरती प्रवास करणाऱ्यांसाठी महत्त्वाची बातमी; 'या' वेळेत वाहतूक राहणार बंद

Mumbai-Pune Expressway Traffic Updates: मुंबई-पुणे एक्सप्रेस वेवरून प्रवास करणाऱ्यांसाठी अत्यंत महत्वाची बातमी आहे. मुंबई-पुणे एक्सप्रेस वेवरील वाहतूक २ तासांसाठी बंद ठेवण्यात येणार आहे. दुपारी १२ ते २ या वेळी महामार्ग बंद ठेवण्याचा निर्णय घेण्यात आला आहे. या कालावधीत रस्त्यावरील दरड हटवण्यात येणार आहेत.

रविवारी (२३ जुलै) रात्रीच्या सुमारास महामार्गावरील आडोशी बोगद्याजवळ दरड कोसळली होती. त्यामुळे मुंबईकडे जाणाऱ्या तिन्ही लेन बंद करण्यात आल्या होत्या. त्यानंतर पहाटे अडीचपर्यंत दरड हटवण्यात आली होती. त्यानंतर दोन लेन सुरू करण्यात आल्या. अद्याप एक लेन अजुनही बंद आहे.

याच दरडी हटविण्यासाठी प्रशासनाकडून हा निर्णय घेण्यात आला आहे. दरम्यान, एक्सप्रेस वेवरील वाहतूक या दोन तासांसाठी वळवण्यात येणार आहे. पुण्याहून मुंबईकडे येताना चिवळे पॉइंट लागतो, तिथून जुन्या मुंबई पुणे महामार्गाकडे वाहतूक वळवण्यात येणार आहे.

याच मार्गावरुन चार चाकी, हलकी मध्यम, अवजड स्वरुपाची वाहने जातील. १२ ते २ यादरम्यान ही वाहतूक जुन्या महामार्गाकडे वळवण्यात येईल. दरड हटवण्याचं काम पूर्ण झाल्यानंतर मुंबईकडे जाणारी लेन पुन्हा सुरु करण्यात येईल, अशी माहिती एमएसआरडीसीकडून देण्यात आली आहे.