Mumbai Pune Highway Accident : आम्ही जखमींना खांद्यावर उचलून...; पोलिसांनी सांगितली भीषणता

जुन्या मुंबई पुणे महामार्गावर आज पहाटे भीषण अपघात झाला. या अपघातामध्ये १३ जणांचा मृत्यू झाला असून अनेक जण जखमी झाले आहेत. या अपघातानंतर बचावकार्याचा थरारक अनुभव पोलिसांनी शेअर केला आहे.

खोपोलीचे दराडे, राठोड आणि खंदाडे हे पोलीस शिपाई घटनास्थळी सर्वात पहिल्यांदा पोहोचले. त्याबद्दल त्यांनी आपले अनुभव 'एबीपी माझा'शी बोलताना सांगितले आहेत. आपण जखमींना खांद्यावर उचलून घेऊन जात होतो, असंही हे पोलीस शिपाई म्हणाले आहेत.

"सगळे वाचवा - वाचवा ओरडत होते"

घटनास्थळी सर्वात आधी पोहोचलेल्या पोलीस शिपायांनी आपले अनुभव सांगितले आहेत. ते म्हणाले की, आम्ही लोकांना वाचवायचं या उद्देशाने इथे आलो. लोक मदत मदत ओरडत होते. शक्य तेवढ्या माणसांना वर न्यायचं हा प्लॅन ठरला होता. आम्ही सर्वजण खांद्यावर जखमींना वर नेत होतो. खांद्यावर उचलून नेलं. गंभीर लोकांना आधी नेलं. जे जास्त गंभीर जखमी नाहीत, अशा १० जणांना बाजूला बसवलं. सगळे वाचवा वाचवा ओरडत होते. टीम आली, जसं जमल तसं खांद्यावरुन दरीतून वर नेलं.