Mumbai Crime : हुंड्यासाठी धारावीत पतीकडून पत्नीची हत्या; पतीला अटक, सासू सासऱ्याचा शोध सुरू

मुंबई - हुंड्यासाठी धारावी परिसरात पतीने पत्नीची हत्या केल्याची घटना उघडकीस आली आहे. या प्रकरणी पोलिसांकडून कन्हैयालाल सरोज या आरोपी पतीला अटक आहे. या प्रकरणात मृत विवाहितेचे सासू सासऱ्यावर देखील गुन्ह्याची नोंद केली असून सध्या त्यांचा शोध पोलीस घेत आहे. आरोपीने मोठ्या चलाखीने आत्महत्येचा बनाव रचला होता परंतु तपासाअंती महिलेची हत्या झाल्याचे पोलीस तपासात समोर आले.

धारावी येथील शताब्दी नगर येथे रोशनीकुमार सरोज या विवाहितेने आत्महत्या केल्याची माहिती मुंबई पोलिसांच्या मुख्य नियंत्रण कक्षाला शनिवारी मिळाली. ही माहिती मिळताच पोलिसांचे पथक घटनास्थळी तात्काळ दाखल झाले.पाेलिसांनी रोशनीकुमार यांना सायन येथील लोकमान्य टिळक रुग्णालयात नेले. तेथील डॉक्टरांनी त्यांना मृत घोषित केले. याप्रकरणी पोलिसांनी तपास सुरु केला हाेता.

दरम्यान रोशनीकुमार यांचे वडील सुरेशकुमार सरोज यांच्या तक्रारीवरून धारावी पोलिसांनी त्यांचे पती कन्हैयालाल सरोज यांच्यावर खूनाचा गुन्हा दाखल केला. वडिलांनी हुंड्यासाठी त्यांच्या मुलीचा मानसिक आणि शरारिक छळ केला जात हाेता अशी देखील तक्रार केली. महिलेच्या सासू सासरे यांच्यावर देखील गुन्हा दाखल केला आहे असे पाेलिसांनी नमूद केले.पाेलिसांकडून मिळालेल्या माहितीनूसार राेशनीकुमार यांचा गळा दाबून हत्या करण्यात आली. त्यानंतर गळफास घेतल्याचा बनाव करण्यात आला.