लँडिंग करताना विमान धावपट्टीवर घसरले

मुंबई : सोमवारी मध्यरात्री मुंबई विमानतळावर विमान लँड करताना विमान धावपट्टीवर घसरले, मात्र पायलटने वेळीच विमानावर नियंत्रण मिळविल्याने अपघात होण्यापासून ते थोडक्यात बचावले. सदर घटनेनंतर मुख्य रनवे बंद करण्यात आला आहे. 

या घटनेत कोणीही जखमी झाले नसल्याची माहिती छत्रपती शिवाजी महाराज आंतरराष्ट्रीय विमानतळाच्या जनसंपर्क विभागातर्फे देण्यात आली आहे. स्पाइसजेटचे एसजी 6237 हे विमान जयपूरहून मुंबईला आले होते, असे अधिकाऱ्यांनी सांगितले. विमान उतरविताना पायलटकडून काहीतरी गडबड झाल्याची शंका प्रवाशांना आल्याने विमानामधून बाहेर पडण्यासाठी प्रवाशांमध्ये गोंधळ उडाला होता.

सध्या मुंबईत मुसळधार पाऊस सुरू आहे. गेल्या दोन दिवसांपासून ढगाळ वातावरण असल्याने पायलटलाही धावपट्टीचा अंदाज आला नाही. त्यामुळे विमान धावपट्टी ओलांडून पुढे गेले. यंदा मुंबईत गेल्या दोन दशकांमधील सर्वाधिक पाऊस पडला आहे. त्यामुळे रेल्वे आणि विमानसेवांवर परिणाम झाला आहे.