"पीएमआरडीए'च्या अर्थसंकल्पास मंजुरी 

मुंबई - पुणे महानगर प्रदेश विकास प्राधिकरणाच्या (पीएमआरडीए) सन 2019-20 साठीच्या 1722 कोटी 12 लाख रुपयांच्या अंदाजपत्रकास आज मुख्यमंत्री तथा प्राधिकरणाचे अध्यक्ष देवेंद्र फडणवीस यांच्या अध्यक्षतेखालील बैठकीत मंजुरी देण्यात आली.

या अंदाजपत्रकामध्ये रिंगरोड, नदी सुधार, पाणीपुरवठा, नगर रचना योजना व हायपरलूपच्या विकासकामासाठी भरीव तरतूद करण्यात आली आहे. "पीएमआरडीए'च्या विकासाला या अर्थसंकल्पाच्या माध्यमातून चालना मिळणार आहे. शहराच्या विकासाच्या दृष्टीने पायभूत सुविधा व आर्थिक विकासाचा वेग वाढणार आहे. प्राधिकरणाने मंजूर केलेला संकल्पना आराखडा हा विकास आराखडा व्हावा, यासाठी नियोजन करावे, असे मुख्यमंत्री या वेळी म्हणाले.