Political News : मंत्री कपिल पाटील आणि आमदार किसन कथोरे यांचे मनोमिलन झाले का ? कथोरेंच्या कार्यक्रमाला पाटलांची उपस्थिती

डोंबिवली - भाजप आमदार किसन कथोरे यांच्या आमदारकीच्या 19 वर्ष पूर्णत्वाच्या कार्यक्रमाला केंद्रीय पंचायत राज राज्य मंत्री कपिल पाटील यांनी हजेरी लावली. पाटील यांची ही अचानक झालेली एंट्री पाहून साऱ्यांच्याच भुवया उंचावल्या. केंद्रीय मंत्री पाटील यांनी आमदार कथोरे यांना शुभेच्छा दिल्या, तर कथोरे यांनी देखील पुष्पगुच्छ देत त्यांचे स्वागत केले. गेल्या अनेक महिन्यांपासून कथोरे आणि पाटील यांच्यात शीतयुद्ध सुरू असताना अचानक झालेल्या या भेटीने त्यांचे मनोमिलन झाले का ? याविषयी एकच चर्चा रंगली आहे. आगामी काळातील लोकसभा निवडणुका व भिवंडी मतदारसंघ भाजपकडे राखण्यासाठी तयारी केली जात असल्याचे बोलले जात आहे.

शुक्रवारी बदलापूर येथे भाजप आमदार किसन कथोरे यांच्या आमदारकी च्या कारकिर्दीस 19 वर्ष पूर्ण झाल्यानिमित्ताने कार्यक्रमाचे आयोजन करण्यात आले होते. या कार्यक्रमास मंत्री पाटील यांनी उपस्थिती लावली होती. यावेळी विधानपरिषदेचे आमदार ज्ञानेश्वर म्हात्रेही उपस्थिती होते. गेल्या अनेक महिन्यांपासून केंद्रीय पंचायत राज राज्यमंत्री कपिल पाटील आणि मुरबाड विधानसभा मतदारसंघाचे आमदार किसन कथोरे यांच्यात शीतयुद्ध सुरू असल्याच्या चर्चा रंगल्या होत्या. मात्र शुक्रवारी रात्री दोघांच्या या भेटीने वेगळीच चर्चा रंगली आहे.

मुरबाड विधानसभा मतदारसंघाचे आमदार किसन कथोरे आणि भिवंडी लोकसभा मतदारसंघाचे खासदार कपिल पाटील हे दोघेही नेते भाजपचे मोठे नेते म्हणून ओळखले जातात. काही वर्षांपूर्वी कपिल पाटील यांच्या गळ्यात केंद्रीय पंचायतराज राज्यमंत्री पदाची माळ पडली. मात्र एकाच पक्षाचे नेते असूनही गेल्या काही महिन्यात दोन्ही नेत्यांमध्ये मोठे शीतयुद्ध रंगले होते.

अप्रत्यक्षपणे दोन्ही नेत्यांनी एकमेकांवर कुरघोडी करण्याची संधी सोडली नव्हती. जिल्हा नियोजन समितीच्या बैठकी नंतर केंद्रीय मंत्री कपिल पाटील आणि आमदार किसन कथोरे यांच्यात नाव न घेता शीत युद्ध रंगले होते. त्यानंतर दोन्ही नेत्यांकडून वरिष्ठांकडे आपली बाजूही मांडण्यात आली होती. मात्र त्यानंतरही दोघांमध्ये विस्तव जात नव्हता. या दोघांच्या शीतयुद्धामुळे कार्यकर्तेही संभ्रमात होते. त्यामुळे दोन्ही नेत्यांनी सबुरीने घेऊन मनोमिलन करावे अशी आशा व्यक्त होत होती.यातच विधानपरिषद आमदार म्हात्रे यांच्यामुळे ही दुरी कमी झाल्याचे बोलले जात आहे. मात्र याबाबत अधिकृत रित्या कोणीही प्रतिक्रिया अद्याप दिलेली नाहीं..

केंद्रीय पंचायतराज राज्यमंत्री कपिल पाटील यांच्या आगमनाची घोषणा....

शुक्रवारी आमदार किसन कथोरे यांच्या राजकीय कारकिर्दीला 42 वर्षे आणि आमदारकी कारकिर्दीला 19 वर्षे पूर्ण झाल्याबद्दल त्यांच्या समर्थकांनी त्यांचा गौरव सोहळा आणि प्रकट मुलाखत आयोजित केली होती.

या मुलाखत कार्यक्रमाच्या सुरुवातीला केंद्रीय पंचायतराज राज्यमंत्री कपिल पाटील यांच्या आगमनाची घोषणा झाली आणि अनेकांच्या भुवया उंचावल्या. मुलाखत सुरू होण्यापूर्वी मंत्री कपिल पाटील कार्यक्रमस्थळी पोहोचून त्यांनी आमदार किसन कथोरे यांचे अभिनंदन केले. त्यानंतर काही काळ पाटील यांनी किसन कथोरे यांची मुलाखत ऐकली. या प्रसंगामुळे गेल्या महिन्यांपासून सुरू असलेला वाद संपुष्टात आल्याचे बोलले जाते आहे. तर या दोघांच्या मनोमिलनानंतर संकटात असलेल्या भाजप कार्यकर्त्यांनी सुटकेचा निःश्वास सोडला आहे.