प्रदूषणाचा विषारी डंख

मुंबई - देशातील सर्वाधिक प्रदूषित शहर समजल्या जाणाऱ्या दिल्लीलाही मुंबई आणि नवी मुंबईने मागे टाकल्याने आरोग्याचा प्रश्‍न पुन्हा गंभीर झाला आहे. सातत्याने होत असलेले वातावरणातील बदल, शहरभर पसरलेला कचरा आणि उघड्यावर केल्या जाणाऱ्या प्रातर्विधीमुळे मुंबईकरांचे आरोग्य आधीच धोक्यात आले असतानाच प्रदूषणाच्या डंखामुळे त्यांचे शरीर पोखरले जात आहे.

केंद्र सरकारच्या निकषानुसार मुंबईची हवा ‘वाईट’ श्रेणीत पोहोचली आहे. शहरातील हवा श्‍वसनासाठी योग्य राहिलेली नाही. त्याचा थेट परिणाम मानवी जीवाच्या फुप्फुसावर होत आहे. प्रदूषणामुळे फुप्फुसाचा कॅन्सर होऊ शकतो; पण माणसाच्या डोक्‍याच्या केसापासून पायाच्या नखापर्यंत त्याचे दुष्परिणाम जाणवतात. श्‍वसनविकाराने त्रस्त असलेले रुग्ण, वृद्ध आणि लहान मुलांमध्ये प्रदूषणाचे परिणाम दिसू लागले आहेत. प्रदूषणात प्रामुख्याने २.५ आणि १० असे दोन प्रकारचे तरंगते धूलिकण आढळतात. त्याचबरोबर नायट्रोजन डायऑक्‍साईड आणि सल्फर डायऑक्‍साईड अशी प्रदूषकेही आढळतात. वाढलेल्या प्रदूषणामुळे त्वचेची जळजळ, बुरशीजन्य आजार आणि घामोळ्यांसारखे त्वचा विकार होतात.

प्रदूषण जास्त काळ टिकल्यास त्याचे परिणाम जाणवू लागतात. प्रदूषणामुळे खास करून खरूज आणि बुरशीजन्य त्वचाविकार असे आजार आढळतात. पण, प्रदूषणाचा सर्वाधिक परिणाम मानवाच्या अंतर्गत अवयवांवर होतो.
- डॉ. उदय खोपकर, त्वचा विकार विभाग प्रमुख, केईएम रुग्णालय