अपंगांना मतदानासाठी आयोगाचा आधार

महाड : अपंगांना मतदानाचा हक्क बजावणे सोपे व्हावे यासाठी प्रशासनाने अपंगांसाठी साधने, वाहने आणि स्वयंसेवक तैनात केले आहेत. यामुळे मतदान केंद्रावर येणाऱ्या अपंगांची कोणत्याही प्रकारची गैरसोय होणार नाही. 

दुर्गम भागातील मतदान केंद्र दूर अंतरावर असल्याने अपंग मतदानासाठी बाहेर पडत नाहीत. त्यामुळे मतदान करण्याची प्रबळ इच्छा असूनही हे मतदार मतदानापासून दूर राहतात. त्यामुळे त्यांना प्रवाहात आणण्यासाठी निवडणूक आयोगाने प्रयत्न सुरू केले आहेत. या वेळच्या विधानसभा निवडणुकीतही अपंगांना विनासायास आणि मोकळ्या वातावरणामध्ये मतदान करता यावे याकरिता प्रशासनाने तयारी पूर्ण केली आहे.

महाड मतदारसंघामध्ये २ हजार १११ अपंग मतदार आहेत. यापैकी १०६ अंध मतदार आहेत. १ हजार ४७० अस्थिव्यंग मतदार, १०७ दृष्टिदोष असलेले मतदार, २२४ मूकबधिर, १३ बहुविकलांग; तर १९१ मतिमंद अशा विविध प्रकारातील अपंग मतदारांचा यात सहभाग आहे. यामध्ये या मतदारांना मतदान केंद्रावर आणण्यासाठी २२० गाड्यांची सोय करण्यात आली आहे. ९१ केंद्रांवर हे अपंग मतदान करणार आहेत. 

अपंगांसाठी ७६ व्हिलचेअरची सोय करण्यात आलेली आहे. ९ डोलींची सोय या ठिकाणी करण्यात आलेली आहे. अंध मतदारांना मतदान करता यावे याकरिता १०६ ब्रेलशिट्‌स तयार करण्यात आलेल्या आहेत. अपंगांना मतदान केंद्रावर ये-जा करण्याकरता त्यांच्यासोबत ३७९ स्वयंसेवकही सज्ज ठेवण्यात आलेले आहेत.