Mumbai News : राज व शिल्पाच्या मालमत्तेवर टाच

मुंबई - आर्थिक फसवणूकप्रकरणी सक्तवसुली संचालनालयाने (ईडी) गुरुवारी उद्योगपती राज कुंद्रा आणि त्यांची पत्नी अभिनेत्री शिल्पा शेट्टी यांच्याशी संबंधित ९७ कोटी ७९ लाखांची मालमत्ता तात्पुरती जप्त केली आहे. यात शिल्पा शेट्टीच्या नावावर असलेली मुंबईच्या जुहू परिसरातील सदनिका आणि पुण्यातील बंगल्याचा समावेश आहे.

एका बिटकॉइन कंपनीच्या माध्यमातून झालेल्या आर्थिक फसवणुकीशी संबंधित ‘ईडी’ने ही कारवाई केली आहे. एका बिटकॉइन कंपनीच्या नावाने संकेतस्थळ बनवून अनेकांची कोट्यवधींची फसवणूक झाली होती. पुणे पोलिसांनी कोट्यवधीच्या बिटकॉईन गैरव्यवहारप्रकरणी अमित आणि विवेक भारद्वाज बंधूंना अटक केली होती. त्यांच्यावर आठ हजार गुंतवणूकदारांची दोन हजार कोटींची फसवणूक केल्याचा आरोप होता.

त्यानंतर ‘ईडी’ने याप्रकरणी आर्थिक गैरव्यवहार प्रतिबंधक कायद्यानुसार (पीएमएलए) गुन्हा नोंदवून तपास सुरू केला होता. या प्रकरणाशी राज कुंद्रांचे संबंध असल्याचे धागेदोरे तपासात उघड झाले होते. याप्रकरणी कुंद्रा यांची चौकशीही करण्यात आली होती. २०२१ मध्ये पोर्नोग्राफी प्रकरणात कुंद्रा यांचे नाव समोर आले होते. या प्रकरणात कुंद्रा यांना अटक झाली होती. काही महिन्यांनंतर त्यांची जामिनावर सुटका झाली होती.