जुलमी राजवट उलथविण्याची व्यंग्यचित्रकारात धमक - राज

मुंबई - व्यंग्यचित्रकारात जुलमी राजवट उलथविण्याची धमक असल्याचे मनसे अध्यक्ष राज ठाकरे यांनी म्हटले आहे.

जागतिक व्यंग्यचित्रकार दिनानिमित्त ट्‌विटरच्या माध्यमातून व्यंग्यचित्रकार सहकाऱ्यांना शुभेच्छा देतानाही राज यांनी कुंचल्याची ताकद काय असते ते दाखवून दिले आहे. व्यंग्यचित्रकाराच्या कुंचल्यात इतकी ताकद असते की एखादी जुलमी राजवट उलथवली जाऊ शकते, अशा शब्दांत राज ठाकरे यांनी आपल्या कुंचल्यातून राजकीय फटकारे ओढले आहेत. जागतिक व्यंग्यचित्रकार दिनानिमित्ताने व्यंग्यचित्रकार सहकाऱ्यांना शुभेच्छा तर आहेच, पण तुमच्या प्रतिभेची देशाला सगळ्यात जास्त गरज आहे, हे मात्र विसरू नका, असे राज यांनी ट्‌विट केले आहे.