"गरीब मराठा समाजाला आरक्षण मिळावं असं राज ठाकरेंचं मत"

मुंबई- मराठा आरक्षणप्रकरणी संभाजीराजे छत्रपती यांनी मनसेप्रमुख राजे ठाकरे यांची भेट घेतली. संभाजीराजे कृष्णकुंज या राज ठाकरेंच्या निवासस्थानी गेले होते. राज ठाकरे आणि संभाजीराजे यांच्यात जवळपास अर्धा तास चर्चा झाली. राज ठाकरेंसोबतच्या भेटीनंतर संभाजीराजेंनी माध्यमांशी संवाद साधला. मनसे प्रमुख राज ठाकरे यांची काम करण्याची पद्धत वेगळी आहे. ते जात पात मानत नाहीत. पण, गरीब मराठ्यांना आरक्षण मिळावं हे त्या मताचे आहेत. माझ्या भूमिकेला ते पाठिंबा देतात. माझे पंजोबा राजर्षी छत्रपती शाहू महाराज आणि राज ठाकरेंचे आजोबा प्रबोधनकार ठाकरे हे चांगले मित्र होते आणि छत्रपती- ठाकरे घराण्याचं नातं आजही कायम आहे. किल्ल्याच्या संवर्धनाबाबतही आमच्या चर्चा झाली, असं संभाजीराजे यांनी सांगितलं. ( sambhaji raje meet mns raj thackeray support maratha reservation)

मराठा समाजाला न्याय मिळावा यासाठी सर्व पक्षांच्या प्रमुखांची भेटी घेतोय. हे माझ्यासाठी नाही, तर समाजासाठी आहे. सकाळी राष्ट्रवादी काँग्रेसचे प्रमुख शरद पवार यांची भेट घेतली, आता राज ठाकरेंची भेट झाली. उद्या विरोधी पक्षनेते देवेंद्र फडणवीस आणि मुख्यमंत्री उद्धव ठाकरे यांची भेट घेईन. सुप्रीम कोर्टाने मराठा आरक्षण रद्द केलंय. यातून मार्ग काढण्यासाठी जबाबदारी माझी एकट्याची नाही, तर सर्व नेत्यांची आहे. मराठा आरक्षणाला स्थगिती मिळाली आहे पण त्यातून आता मार्ग कसा काढायचा आणि समाजाला न्याय कसा मिळायला हवा यावर चर्चा व्हावी, असं संभाजीराजे म्हणाले.

संभाजीराजेंनी मराठा आरक्षणासाठी राज्यातील प्रमुख नेत्यांनी एकत्र येण्याचे आवाहन केले आहे. संभाजीराजे यांनी याआधी शरद पवार यांची भेट घेतली होती. या भेटीनंतर संभाजीराजे छत्रपती म्हणाले की, गेल्या काही दिवसांपासून मी राज्यभरात फिरत आहे. मराठा समाजाच्या भावना समजून घेण्याचा प्रयत्न करत आहे. आज शरद पवारांची भेट घेतली. मराठा समाज किती अस्वस्थ आहे, दु:खी आहे, हे त्यांना सांगितलं. मराठा आरक्षणप्रकरणी त्यांनी पुढाकार घेणे आवश्यक आहे. राजकीय मतभेद दूर ठेवून उद्धव ठाकरे, विरोधी पक्षनेते देवेंद्र फडणवीस, नारायण राणे यांनी एकत्र यायला पाहिजे आणि यातून मार्ग काढण्यासाठी प्रयत्न करायला हवेत. शुक्रवारी मी उद्धव ठाकरे आणि देवेंद्र फडणवीस यांची भेट घेईन. त्यानंतर पत्रकार परिषदेत माझी भूमिका स्पष्ट करेन.