आम्ही देखील पाहून घेऊ, अनिल परबांच्या कारवाईनंतर राऊतांचा इशारा

मुंबई : परिवहन मंत्री अनिल परब यांच्यावर ईडीने कारवाई केल्यानंतर राज्यात घडामोडींना वेग आलाय. परब यांचे अनिल देशमुख आणि सचिन वाझे प्रकरणातील धागेदोरे शोधण्यासाठी केंद्रीय यंत्रणांनी दंड थोपटले आहेत. यानंतर महाराष्ट्रात आरोप प्रत्यारोपाला सुरुवात झाली.

(Sanjay Raut On Anil Parab ED Raid)

आज खासदार संजय राऊत आणि सेनेचे नेते संजय पवार राज्यसभेसाठी अर्ज दाखल कऱणार आहेत. त्याआधीच ही करावाई झाल्याने सगळ्यांच्या भुवया उंचावल्या आहेत. संजय राऊत यांनी कारवाई झाल्यानंतर थेट केंद्र आणि भाजपवर आरोप करत प्रतिआव्हान दिलं आहे. आम्हीही बघून घेऊ, असं ते म्हणाले.

अनिल परब कडवट शिवसैनिक आहेत. त्यांच्या विरोधात राजकीय सुडबुद्धीने या कारवाया सुरू आहे. ज्या पद्धतीचे आरोप आमच्यावर लावले जात आहेत. त्यापेक्षा गंभीर गुन्हे भाजपच्या लोकांवर आहेत. ईडीने त्याचीही चौकशी करावी, असं राऊत यांनी म्हटलंय.

आम्ही सर्व शिवसैनिक आणि पक्ष परबांच्या पाठिशी उभे आहोत. मनपा निवडणुका सुरळीत पार पडतील. महाविकास आघाडी सरकारही सुरळीत चालेल, असं राऊत म्हणाले.

महाराष्ट्रीतील राजकारणाला इतकं वाईट वळण गेल्या ५५ वर्षात कधीच लागलं नाही. या कारवायांमुळे महाविकास आघाडीचं मनोबल ढासळणार नाही. आमच्याकडे सुद्धा सबळ पुरावे आहेत. जितू नवलानीला कोणी पळवलं, याचं उत्तर सबळ पुरावे असणाऱ्यांनी द्याव, असा टोला ही राऊतांनी लगावलाय.

फक्त सरकारला त्रास देण्यासाठी या कारवाया सुरू आहेत. शिवसेनेला बदनाम करण्यासाठी आणि मविआ सरकारला अडचणीत आणण्यासाठी या कारवाया आहेत. पण आमच्या मनोबलावर काही कारवाई होणार नसल्याचं संजय राऊत यांनी स्पष्ट केलं.