आर्यन दहा मिनिटं आई-वडिलांशी बोलला.
क्रुझवरील अमलीपदार्थ प्रकरणात अटकेत असलेल्या सुपरस्टार शाहरुख खानच्या Shah Rukh Khan मुलाचा, आर्यनचा Aryan Khan कारागृहातील मुक्काम २० ऑक्टोबरपर्यंत वाढला आहे. आर्यनने केलेल्या जामीन अर्जावरील निकाल विशेष न्यायालयाने २० ऑक्टोबरपर्यंत राखून ठेवला आहे. दसऱ्यानिमित्त आर्यनने आर्थर रोड कारागृहातून आई गौरी Gauri Khan आणि वडील शाहरुख खानशी व्हिडीओ कॉलद्वारे संवाद साधला. आर्यनने दहा मिनिटं आई-वडिलांशी गप्पा मारल्या. सणासुदीच्या काळात कारागृहात कैद्यांना त्यांच्या कुटुंबीयांना भेटण्यासाठी वेळ दिला जातो. मात्र कोविडच्या पार्श्वभूमीवर कुटुंबीयांना भेटणं शक्य नसल्यामुळे कारागृह प्रशासनाने व्हिडीओ कॉलिंगची व्यवस्था केली आहे.
कारागृहातील अंदाजे एकूण ३२०० कैद्यांना टप्याटप्याने १० मिनिटांसाठी व्हिडीओ कॉलद्वारे कुटुंबीयांशी बोलण्याची संधी दिली जाते. सध्या आर्थर रोड कारागृहात व्हिडीओ कॉलिंगसाठी ११ स्मार्टफोन हँडसेट आहेत. "आर्यनने व्हिडीओ कॉलिंगसाठी आईचा नंबर दिला. आई आणि वडिलांसोबत तो जवळपास १० मिनिटे बोलला", अशी माहिती वरिष्ठ तुरुंग अधिकाऱ्याने दिली. कारागृहाच्या नियमांनुसार, गुन्हा सिद्ध न झालेले आरोपी हे महिन्यातून दोन किंवा तीन वेळा कारागृहातील पोलीस कॉन्स्टेबलच्या उपस्थितीत त्यांच्या कुटुंबीयांशी किंवा वकिलाशी संवाद साधू शकतात.
आर्यनसह पाच जणांनी जामिनासाठी अर्ज केला होता. २ ऑक्टोबरपासून तो अटकेत आहे आणि सध्या न्यायालयीन कोठडीत आहे. त्याच्यावर एनसीबीने गंभीर आरोप केले असून आंतरराष्ट्रीय तस्करांशी त्याचा संपर्क होता असा दावा केला आहे. विशेष न्या. व्ही व्ही पाटील यांनी तीनही अर्ज २० ऑक्टोबर रोजी निकालासाठी राखून ठेवले आहेत.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.