Dombivali News : शरद पवार पप्पू कलानीच्या भेटीला; उल्हासनगर मधील त्यांच्या राहत्या घरी घेतली भेट

डोंबिवली - उल्हासनगरात सत्तेच्या केंद्रस्थानी राहणारे कलानी कुटुंब पुन्हा राष्ट्रवादीत स्वगृही परतले आहे. मात्र, राष्ट्रवादीत शरद पवार आणि अजित पवार असे दोन गट पडल्यानंतर कलानी कुटुंब आपल्या राजकीय भूमिकेपासून काहीसे अंतर राखून आहे. मध्यंतरी रोहित पवार यांनी पप्पू कलानी यांची त्यांच्या घरी जाऊन भेट घेतली होती. तर त्यांचे सुपुत्र ओमी कलानी व त्यांच्या पत्नी पंचम कलानी यांनी उपमुख्यमंत्री अजित पवार यांची भेट घेतली होती.

राष्ट्रवादी पक्षाचा ताबा अजित पवार यांच्याकडे गेल्यानंतर आता पक्षाचे अध्यक्ष शरद पवार यांनी स्वतः कलानी महल येथे येत कलानी कुटुंबाची भेट घेतली आहे. पवार कलानी भेटीमुळे राजकिय वर्तुळात चर्चेला उधाण आले आहे.

उल्हासनगर शहराच्या राजकारणात प्रभाव पडणारे कलानी कुटुंब ज्या पक्षाच्या पारड्यात आपले वजन टाकतात ते पारडे जड मानले जाते. त्यामुळे त्यांचा पाठिंबा मिळवण्यासाठी सर्वच पक्ष प्रयत्नांत असतात. राष्ट्रवादी काँग्रेस पक्षात पडलेली अभूतपूर्व फूट ही कलानी कुटुंबाचे महत्त्व वाढवून गेली असून, त्यांचा पाठिंबा मिळवण्यासाठी राष्ट्रवादी काँग्रेस पक्षाचे दोन्ही गट सक्रिय आहेत.

पप्पू कलानींचे शरद पवारांसोबत असलेले जुने संबंध, जयंत पाटील, जितेंद्र आव्हाड यांच्या कलानी महलात होणाऱ्या भेटीगाठी, त्यानंतर रोहित पवार यांनी पप्पू पप्पूकलानी यांची घेतलेली भेट पाहता आगामी निवडणुकांसाठी कलानी गटाचा कल शरद पवारांच्या राष्ट्रवादीकडेच राहण्याची शक्यता असे म्हंटले जात होते.

त्यातच पप्पू कलानींचे सुपुत्र ओमी कलानी आणि त्यांच्या पत्नी माजी महापौर पचंम कलानी यांनी उपमुख्यमंत्री अजित पवार यांची भेट घेतली होती. ही भेट आनंद परांजपे यांनी घडवून आणत या चर्चेला बगल दिली होती. ओमी कलानी यांनी एकनाथ शिंदे यांना देखील पाठिंबा जाहीर केला होता. यामुळे कलानी कुटुंबाचा कल नेमका कोणाकडे यावर अद्यापही प्रश्नचिन्ह आहे.

सोमवारी राष्ट्रवादी पक्षाचे अध्यक्ष शरद पवार यांनी उल्हासनगर येथे येत पप्पू कलानी यांच्या महल मध्ये जाऊन त्यांची भेट घेतली आहे. नुकताच पक्षाचा ताबा हा अजित पवार यांच्याकडे गेल्याने यानंतर कलानी आणि शरद पवार यांची भेट ही महत्त्वपूर्ण असल्याचे बोलले जात आहे. पक्षाचा ताबा अजित पवार यांच्याकडे गेल्यानंतर उल्हासनगर येथे शरद पवार यांच्या उपस्थितीत एल्गार परिषदेचे आयोजन करण्यात आले आहे. उल्हासनगर येथे राष्ट्रवादीचे पदाधिकारी व माजी नगरसेवकांची त्यांनी यादरम्यान भेट घेतली.

याविषयी ओमी कलानी यांना विचारले असता ते म्हणाले की वडील हे हैद्राबाद येथे आहेत. राष्ट्रवादी चे अध्यक्ष पवार यांनी आज कलानी कुटुंबाची भेट घेतली.