केडीएमसीच्या डॉक्टरांचे सहा दिवसांत सहा राजीनामे

कल्याण : कल्याण डोंबिवली महापालिकेची रुग्णालये कायमच वादग्रस्त राहिली आहेत. गुरुवारच्या महासभेत सर्वपक्षीय नगरसेवकांनी विविध समस्यांकडे लक्ष वेधत आरोग्यसेवेची चिरफाड केली. यावर चर्चा सुरु असताना गेल्या सहा दिवसात सहा डॉक्टरांनी राजीनामे दिले असल्याची धक्क्कादायक माहिती पालिका प्रशासनाने सभागृहात मांडली. त्यामुळे पालिकेची आरोग्यव्यस्था दिवसेंदिवस ढासळत असल्याचे दिसून येते. 

आरोग्यव्यवस्थेच्या विविध समस्यांवर लक्षवेधी मांडली होती. रुग्णवाहिकेला चालक नसणे, डॉक्टर व इतर कर्मचाऱ्यांची वानवा, बंद असलेले सूतीकागृह या विषयांवर नगरसेविका सुनीता राणे, नगरसेवक विश्वनाथ राणे यांनी आक्रमकपणे भूमिका मांडली. तसेच पालिकेत कार्यरत असलेल्या डॉक्टरांना कायस्वरूपी रुजू करण्याचा प्रस्ताव लांबला असून, कमी पगारावर डॉक्टर काम करत आहेत. हा मुद्दाही सदस्यांनी मांडला.

यावर उत्तर देताना सहा दिवसात सहा डॉक्टरांनी राजीनामे दिले असल्याचा खुलासा वैद्यकीय आरोग्य अधिकारी डॉ. राजू लवंगारे यांनी केला.