Mumbai News : लोकसभा निवडणुकीत पिपाणी या चिन्हाचा फटका बसल्यानंतर राष्ट्रवादी काँग्रेस (शरदचंद्र पवार) पक्षाने विधानसभेसाठी हे चिन्हच वगळण्याची मागणी केली आहे. याबाबतचे पत्र केंद्रीय निवडणूक आयोगाला देण्यात आले आहे. तसेच याबाबत लवकरात लवकर निर्णय घ्यावा, अन्यथा न्यायालयात जाण्याचा इशारा पक्षाकडून देण्यात आला आहे.
लोकसभा निवडणुकीत शरद पवार यांच्या राष्ट्रवादी काँग्रेस पक्षाला ‘तुतारी वाजवणारा माणूस’ हे चिन्ह देण्यात आले. अपक्ष उमेदवारांना ‘पिपाणी’ हे चिन्ह देण्यात आले. या दोन्ही चिन्हांत साधर्म्य असल्याने राष्ट्रवादी काँग्रेसच्या मतांना फटका बसला आहे.
त्यामुळे विधानसभा निवडणुकीसाठी हे चिन्ह वगळावे, अशी मागणी त्यांनी केली आहे. सातारा लोकसभा मतदारसंघातील ‘राष्ट्रवादी’चे उमेदवार शशिकांत शिंदे यांना ‘पिपाणी’ या चिन्हाचा फटका बसला आहे.
या मतदारसंघातून ‘पिपाणी’ या चिन्हावर अपक्ष लढणाऱ्या उमेदवाराला ३७ हजार मते मिळाली. तेथे भाजपचे उदयनराजे यांनी शिंदे यांचा ४५ हजार मतांनी पराभव केला. अपक्ष उमेदवार रिंगणात नसता तर येथील निकाल ‘राष्ट्रवादी’च्या बाजूने लागला असता, असा दावा केला जात आहे.
‘पिपाणी’ चिन्हाबद्दल राष्ट्रवादी काँग्रेस (शरदचंद्र पवार) पक्षाने निवडणूक आयोगाकडे धाव घेतली आहे. पक्षाकडून आयोगाला पत्र देत मुक्त चिन्हांमधून पिपाणी चिन्ह वगळण्याची विनंती करण्यात आली आहे. मुक्त चिन्हांमध्ये ‘पिपाणी’ आणि ‘तुतारी वाजवणारा माणूस’ या चिन्हाचा समावेश असल्यामुळे अडचणी येत असल्याचा उल्लेख करण्यात आला आहे. याबाबत लवकरात लवकर निर्णय घ्यावा; अन्यथा न्यायालयाचे दार ठोठावणार असल्याचेही पत्रात म्हटले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.