...तरीही तिने सापाला सोडले नाही!

मुंबई : पोटच्या कन्येला सापाने दंश केला. एकदा नव्हे, तर दोनदा. तिच्या किंकाळ्या ऐकून धावलेल्या मातेने स्वतःची पर्वा न करता त्या सापाला दूर फेकण्याचा प्रयत्न केला, पण चवताळलेल्या त्या सापाने तिलाही दंश केला. तरीही तिने त्याला सोडले नाही. एका हातात घट्ट पकडले... 

आता तिच्या नजरेसमोर एकच लक्ष्य होते. कसेही करून मुलीला रुग्णालयात न्यायचे. तिला वाचवायचे. स्वतःला होत असलेल्या वेदना विसरून तिने धारावीतल्या त्या झोपडीतून मुलीला खेचतच बाहेर आणले. दुसऱ्या हातात तो दीड फुटी साप होताच. स्वतःला प्रचंड वेदना होत आहेत. मुलीवर मृत्यूची काळी छाया पडलेली आहे. अशा अवस्थेतही त्या मातेच्या ध्यानात एक बाब पक्की होती. त्या सापालाही डॉक्‍टरांना दाखविले पाहिजे. म्हणजे मग त्यांना तो कोणत्या जातीचा आहे ते कळेल. त्याच्या विषावर कोणते उपचार करायचे ते समजेल. 

मुलीला घेऊन ती रस्त्यावर आली. टॅक्‍सी पकडली आणि थेट शीव रुग्णालय गाठले. तेथे डॉक्‍टरांनी दोघी माय-लेकींना तातडीने अतिदक्षता विभागात दाखल केले. त्या सापाला बरणीत बंद केले. पशुवैद्यकीय विभागातील डॉक्‍टरांनी येऊन त्याची तपासणी केली. त्यात तो साप जहरी असल्याचे स्पष्ट झाले. त्यानुसार मग लगेचच पुढचे उपचार सुरू करण्यात आले. 

नेचरपार्कजवळील राजीव गांधी नगरमध्ये राहणाऱ्या त्या महिलेचे नाव सुलताना खान (वय ३२) असे असून, तिच्या मुलीचे नाव तेहसीन (वय १८) आहे. तेहसीन ही अजूनही आयसीयूमध्ये आहे; मात्र तिच्या जिवावरचा धोका टळला आहे. पावसामुळे त्यांच्या घरात तो विषारी साप शिरला होता. चुकून त्याला तेहसीनचा हात लागला आणि त्याने हाताला दंश केला. त्याबरोबर किंकाळी फोडून तिने त्याला झिडकारण्याचा प्रयत्न केला, तसा तो पुन्हा चावला. त्या किंकाळ्या ऐकून सुलताना धावल्या. त्या सापावर त्या तुटूनच पडल्या. पण त्याने त्यांचाही चावा घेतला. पण मुलीच्या मायेपुढे त्या सापाच्या विषाची मात्रा मात्र चालली नाही.