मुंबई- अभिनेता सोनू सूदनं लॉकडाऊनच्या काळात इतर राज्यात अडकलेल्या मजुरांना त्यांच्या घरी पाठवण्यासाठी महत्त्वाची भूमिका बजावली. मात्र गेल्या काही दिवसांपासून सोनू सूदच्या या भूमिकेवरुन राजकारण सुरु झालं. सूद यानं केलेल्या कामावर रविवारी सामनाच्या रोखठोक सदरातून टीका करण्यात आली आहे. त्यानंतर या राजकारणाला सुरुवात झाली. दरम्यान आता वांद्रे टर्मिनस येथून श्रमिक ट्रेनने उत्तर प्रदेशला निघालेल्या मजुरांच्या भेटीसाठी गेलेल्या अभिनेता सोनू सूदला पोलिसांनी रेल्वे स्थानकाबाहेरच रोखलं. प्रवेश नाकारण्यात आल्यामुळं त्यानं तिथून परतण्याचा निर्णय घेतला. त्यामुळे सोनू सूदला मजुरांना न भेटताच वांद्रे टर्मिनसच्या बाहेरुनच प्रवाशांचा निरोप घेऊन परतावं लागलं.
वांद्रे टर्मिनसवरुन सोमवारी रात्री आठ वाजेच्या सुमारास श्रमिकांची विशेष ट्रेन उत्तर प्रदेशसाठी रवाना झाली. या ट्रेनने उत्तर प्रदेशला जाणाऱ्या मजुरांच्या भेटीसाठी सोनू सूद वांद्रे टर्मिनस येथे जाणार होता. सोनू सूद मजुरांच्या भेटीसाठी वांद्रे टर्मिनस येथे पोहोचल्यावर पोलिसांनी त्याला प्लॅटफॉर्मवर जाण्यापासून रोखलं. त्यामुळे मजुरांना न भेटताच सोनू सूद परतला.
राज्यात लॉकडाऊन जाहीर केल्यानंतर मुंबईत अडकलेल्या श्रमिकांना त्यांच्या गावी पोहोचवण्याचं काम सोनू सध्या करत आहे. आजवर हजारो मजुरांना त्यानं खासगी बस आणि रेल्वेनं घरी जाण्यासाठी मदत केली आहे. अजूनही सोनू हे काम करत आहे. सोमवारी देखील त्यानं उत्तर प्रदेशातील आझमगड येथील काही मजुरांना गावी जाण्यासाठी ट्रेनची व्यवस्था केली होती. त्यांना निरोप देण्यासाठी तो स्वत: वांद्रे रेल्वे टर्मिनसवर आला होता. मात्र, सुरक्षा रक्षकांनी त्याला प्लॅटफॉर्मवर जाण्याची परवानगी दिली नाही.
दरम्यान प्लॅटफॉर्मवर जाण्यासाठी परवानगी मिळावी यासाठी त्यानं रेल्वे पोलिसांच्या कार्यालयात जाऊन अधिकाऱ्यांची भेट देखील घेतली आणि त्यांना तशी विनंती केली. मात्र त्याला प्रवेश नाकारण्यात आला. सोनूनं जवळपास 45 मिनिट आरपीएफच्या कार्यालयात बसला होता आणि पोलिसांशी चर्चा करत होता. मात्र त्यानंतरही त्याला परवानगी मिळाली नाही.
सोनूची प्रतिक्रीया
प्लॅटफॉर्मवर परवानगी नाकारल्यानंतर सोनूनं आपली प्रतिक्रीया दिली आहे. सोनू म्हणाला की, या गोष्टीमुळे मला काहीही फरक पडत नाही. मी मजुरांना शुभेच्छा देण्यासाठी आलो होतो. मला प्लॅटफॉर्मवर जाण्याची परवानगी मिळाली की नाही. माझं काम मजुरांना त्यांच्या घरी पोहोचवणे आहे आणि लोक आपल्या घरी सुखरूप पोहोचावेत एवढीच माझी इच्छा आहे.
सामनाच्या अग्रलेखातून सोनू सूदवर टीका
सोनू सूद यानं केलेल्या कामावर रविवारी सामनाच्या रोखठोक सदरातून टीका करण्यात आली होती. शिवसेना नेते खासदार संजय राऊत यांनी याबाबत अनेक प्रश्न उपस्थितीत केले. शिवसेनेचं मुखपत्र 'सामना'त लिहिलेल्या रोखठोक या स्तंभात राऊत यांनी सोनू सूद प्रकरणावर सविस्तर भाष्य केलंय. सोनू सूदला पुढे करत ठाकरे सरकार अपयशी ठरवण्याचा प्रयत्न केला जातोय असं राऊत यांनी आपल्या लेखात म्हटलं आहे.
ठाकरे सरकारला अपयशी ठरवण्याचा प्रयत्न
महाराष्ट्राला सामाजिक चळवळीची मोठी परंपरा आहे. यात महात्मा ज्योतिबा फुले यांच्यापासून ते बाबा आमटेंपर्यंत अनेकांची नावं आहेत, आता यामध्ये सोनू सूदचं नाव घेतलं जाईल. मजुरांना त्यांच्या घरी जाण्यासाठी मदत करताना सोनूची छायाचित्र, व्हिडीओ प्रसिद्ध झाले. सरकार मजुरांना पोहचवण्यात अपयशी ठरलं, पण सोनूसारखे महात्मा हे काम किती सहजतेने करत आहेत असा प्रचार समाजमाध्यमांमध्ये सुरु झाला. खऱ्या कलाकाराला पडदाच लागतो असे नाही, हे महात्मा सूद याने दाखवून दिले, अशी खोचक टीका या सदरातून केली आहे.
सोनू सूदचा चेहरा पुढे करून महाराष्ट्रातले काही राजकीय घटक ‘ठाकरे सरकार’ला अपयशी ठरवण्याचा प्रयत्न करत होते. सोनू सूद हा ‘महाबली’, :बाहुबली’ किंवा ‘सुपरहीरो’ आहे असे चित्र रंगवण्यात हे राजकीय पक्ष काही प्रमाणात यशस्वी झाले. भारतीय जनता पक्षातील काही लोकांनी सोनूला दत्तक घेतले ( हे दत्तक विधान गुप्त पद्धतीने झाले.) आणि त्याला पुढे ठेवून उत्तर भारतीय मजुरांत घुसण्याचा प्रयत्न झाला.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.