मनोर : उत्पादन शुल्क विभागाच्या भरारी पथकाची धडक कारवाई; दोघांना अटक

मनोर : उत्पादन शुल्क विभागाच्या (State excise department) भरारी पथकाने जव्हार तालुक्यातील खंबाळा-जव्हार रस्त्यावर बुधवारी चालतवड गावाजवळ विदेशी मद्याची बेकायदा (illegal selling of alcohol) वाहतूक करणाऱ्यांवर कारवाई केली. कारवाईत ५६२ बल्क लिटर विदेशी मद्य आणि कार मिळून १२ लाख ७३ हजार रुपयांचा मुद्देमाल जप्त करण्यात आला. तसेच दोन आरोपींना अटक (two culprit arrested) करण्यात आली आहे. रमेश पांडू काकड व दौलत नामदेव फुपाणे, अशी अटक केलेल्या आरोपींची नावे आहेत.

चौकशीदरम्यान आरोपींच्या ताब्यात आढळलेला मद्यसाठा केंद्रशासित प्रदेश सिल्वासा-खानवेलच्या मांदुना येथील जानू नावाच्या व्यक्तीकडून खरेदी केला होता. नाशिक जिल्ह्यातील त्र्यंबकेश्वर तालुक्यातील हरसूल गावच्या रीतेश गुणगुणे याला विकणार असल्याची माहिती आरोपींनी दिली. जानू आणि रीतेश गुणगुणे यांना फरार घोषित करण्यात आले आहे. आरोपींना न्यायालयात हजर केले असता त्यांना दोन दिवसांची कोठडी सुनावण्यात आली.