मुंबई लोकलवर दगडफेकीचे संकट!

मुंबई : मुंबईत लोकलवर दगडफेकीच्या घटना दिवसेंदिवस वाढत आहेत. साडेसहा वर्षांत तब्बल ११८ दगडफेकीच्या घटना घडल्या असून त्यात ११३ प्रवासी जखमी झाले आहेत. विशेष म्हणजे ११८ प्रकरणातील केवळ २१ प्रकरणे सोडविण्यातच रेल्वेच्या जीआरपीला यश आले आहे. त्यामुळे दगडफेकीच्या घटनांवर रोख लावण्यासाठी रेल्वे पोलिस अपयशी ठरल्याचे दिसून येत आहे.

मुंबईच्या लोकलला मुंबईची लाईफलाईन समजली जाते. दररोज सुमारे एक कोटीहून अधिक प्रवासी त्यातून प्रवास करतात. प्रवाशांना अक्षरश: जीव मुठीत घेऊन प्रवास करावा लागतो. अशात मागील काही वर्षांतील दगडफेकीच्या घटनांमुळे तर मुंबईकरांचा प्रवास अधिकच अवघड झाला आहे. २०१३ ते जून २०१९ दरम्यानच्या कालावधीत तब्बल ११८ दगडफेकीच्या घटनांमध्ये ११३ प्रवासी जखमी झाले आहेत. त्यात कर्जत ते सीएसएमटीदरम्यान ८४ दगडफेकीच्या घटनांमध्ये ८१ प्रवासी जखमी झाले आहेत. त्या घटनांतील केवळ १५ प्रकरणे सोडविण्यात जीआरपीला यश आले.

हार्बर रेल्वेमार्गावर वडाळा ते पनवेलदरम्यान २१ दगडफेकीच्या घटनांमधील केवळ पाच प्रकरणे सोडविण्यात रेल्वे पोलिसांना यश आले आहे. पश्‍चिम रेल्वेमार्गावरील पालघर ते चर्चगेटदरम्यान १२ दगडफेकीच्या घटनांत १४ प्रवासी जखमी झाले असून त्यातील केवळ एक प्रकरण जीआरपीमार्फत सोडविण्यात आले आहे. आरटीआय कार्यकर्ते शकील अहमद यांनी माहिती अधिकाराच्या आधाराने वास्तव समोर आणले आहे.

वर्षानुसार दगडफेक व जखमींची आकडेवारी
वर्ष         दगडफेकीच्या     जखमी       प्रकरणे      अटक
             घटना                प्रवासी       सोडवली     आरोपी
२०१३      १६                    १४            ३               ३
२०१४      २१                    २०            ४               ४
२०१५      १६                    १६            १               १
२०१६      १२                    ९              १               १
२०१७      १५                    १९            ४               ३
२०१८      २७                    २७            ४               ४
२०१९      ११                    ८              ४               ०