मुंबई- कोरोना व्हायरसनं सर्वत्र कहर माजवला आहे. सर्वाधिक प्रार्दुभाव असलेल्या मुंबईत दिवसेंदिवस कोरोनाबाधित रुग्णांचा आकडा वाढताना दिसतोय. अशातच मुंबईतल्या वांद्रे परिसरातून एक दिलासादायक बातमी समोर आली आहे. वरळी, धारावीतील कोरोना आटोक्यात येत असताना एच पूर्व म्हणजे वांद्रे विभागातही कोरोनाला रोखण्यात मोठं यश आलं आहे. महापालिकेचा वांद्रे विभाग कोरोनाला रोखण्यात मुंबईत अव्वल ठरला आहे.
घरोघरी जाऊन केलेली तपासणी, गरजेनुसार घरीच ऑक्सिजन थेरपी, विलगीकरण आणि प्रतिबंधित क्षेत्रात केलेल्या नियमांच्या कठोर अंमलबजावणीमुळे वांद्रे विभाग कोरोनाला रोखण्यात मुंबईत अव्वल ठरला. या विभागाची आठवड्याची सरासरी वाढ 0.9 टक्क्यांपर्यंत खाली आली आहे. तसंच रुग्ण दुप्पट होण्याचा कालावधीही 76 दिवसांवर गेला आहे. मुंबईचा सरासरी रूग्ण दुपटीचा दर 36 दिवस आणि सरासरी वाढ 1.96 असताना वांद्रे पूर्व विभागानं कोरोनाला रोखण्यात यश मिळवलं आहे.
या विभागात चार टप्प्यांमध्ये काम करण्यात आले. नियमांच्या पालनाबरोबरच दररोज आधल्या दिवशी आढावा घेऊन दुसऱ्या दिवशीचे नियोजन करण्यात आले. बेहरामपाडा, भारतनगर, गोळीबार असा दाटीवाटीचा परिसर आरोग्य कर्मचाऱ्यांनी पिंजून काढला. प्रत्येक नागरिकाचे स्क्रीनिंग करण्यात आले. सावर्जनिक शौचालयांचे दिवसातून 5-6 वेळा निर्जंतुकीकरण करण्यात आले. प्रतिबंधित क्षेत्रामध्ये पोलिसांनी संपूर्ण नाकाबंदी केली. यामुळे या भागातील दैनंदिन रुग्णवाढ 20 पर्यंत खाली आली आहे. मे मध्ये दैनंदिन रुग्णवाढ 95 होती. केंद्रीय पथकानंही तीन वेळा या विभागास भेट दिली आणि घेतलेल्या आढावा प्रसंगी कामाचे कौतुकही केले.
23 मार्चला या भागात पहिला रुग्ण आढळला. यानंतर 23 एप्रिलपर्यंत दररोज 20 रुग्ण आढळून आले. यानंतर 24 एप्रिलपासून ड्रोनच्या माध्यमातून या विभागावर नजर ठेवण्यात आली आणि त्यानुसार कार्यवाही करण्यात आली.
वांद्रे विभागात 18 प्रतिबंधित क्षेत्रे आहेत. तर 160 ठिकाणी इमारती आणि इमारतींचा भाग प्रतिबंधित केलेला आहे. या क्षेत्रात रहिवासी घराबाहेर पडू नयेत यासाठी पोलिस, पालिका प्रशासन आणि स्थानिक लोकप्रतिनिधींच्या समन्वयातून सेवा सुविधा उपलब्ध करून देण्यात आल्या आहेत. या भागात निर्जंतुकीकरणासाठी घनकचरा विभागाचे कामही महत्त्वपूर्ण ठरलं आहे.
सध्या एच पूर्व विभागातील कोरोनाबाधितांचा एकूण आकडा 3182 वर गेला आहे. यामधील 2284 रुग्ण बरे होऊन घरी परतलेत. तर 803 रुग्णांवर उपचार सुरू आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.