तैवानच्या जी फाँग यांची सायकलवरून भारतभ्रमंती

मुंबई : तैवानमध्ये राहणारे ५३ वर्षांचे सायकलपटू सध्या मुंबईच्या रस्त्यावर फिरून भारताच्या संस्कृतीविषयी जाणून घेत आहेत. जी फाँग असे त्यांचे नाव. भारतीय संस्कृती जवळून पाहावी आणि तिचा अनुभव घेता यावा म्हणून त्यांनी दिल्ली ते मुंबई असा तब्बल १५०० किलोमीटरचा प्रवास सायकलने केला. ३ सप्टेंबर रोजी दिल्लीहून सायकलने प्रवास करण्यास त्यांनी सुरुवात केली. राजस्थान आणि गुजरात राज्ये सायकलने पार करीत २३ दिवसांनंतर बुधवारी (ता. २५) ते मुंबईत दाखल झाले. फाँग यांची जिद्द अनेकांसाठी प्रेरणादायी आहे. 

जी फाँग एका चहाच्या कंपनीत काम करतात. भारतातील अनेक भागांतील प्रवास त्यांना अनुभवायचा होता. त्यासाठी फाँग यांनी ३ सप्टेंबर रोजी दिल्लीहून सायकलने प्रवास सुरू केला. प्रवासादरम्यान अनेकांची भेट घेत वेगवेगळ्या ठिकाणी राहत त्यांनी भारतीय संस्कृती जाणून घेतली; मात्र काही दिवसांनंतर त्यांच्याकडचे पैसे संपले. नंतर खेडेगावातील गावकऱ्यांनी त्यांच्या राहण्याची व जेवणाची सोय केली. दिवसाला जवळपास सायकलने ८० किलोमीटरचा प्रवास करत त्यांनी राजस्थान व गुजरात राज्ये पालथी घातली. 

पुन्हा भारतात येणार...
जी फाँग यांनी १५०० किलोमीटरचा सायकलचा प्रवास २३ दिवसांत पूर्ण केला. पुढील सहा महिन्यांनी पुन्हा भारतात येऊन सायकलची सफारी करण्याचा मानस असल्याचे फाँग यांनी सांगितले.