आजपासून तापमानात घट हवामान विभागाचा अंदाज 

मुंबई - पूर्वेकडील उष्ण वाऱ्यांचा प्रभाव वाढल्यामुळे मुंबईतील तापमानात वाढ झाली होती. परंतु, बुधवारपासून (ता. 6) कमाल तापमानात घट होण्यास सुरुवात होईल, असा अंदाज मुंबई प्रादेशिक हवामान विभागाने वर्तवला आहे. 

सध्या राज्यातील थंडीसाठी अनुकूल परिस्थिती नाही. थंडीसाठी आवश्‍यक "वेस्टर्न डिस्टर्बन्स' ही स्थिती अफगाणिस्तानावर तयार झाली आहे. लवकरच ही स्थिती देशाच्या उत्तरेकडील भागावर निर्माण होईल. त्यानंतर हवेच्या प्रवाहांत बदल घडण्याची शक्‍यता आहे. उत्तरेकडून थंड वारे वाहू लागले की तापमानात घट होते. असा बदल लवकरच होईल, असे हवामान विभागातील अधिकाऱ्यांनी सांगितले. कमाल तापमान मंगळवारी दोन अंशांनी कमी होऊन 33 अंश सेल्सिअस नोंदवले गेले; ते बुधवारी 31 अंशांपर्यंत कमी होईल. किमान तापमान मात्र एका अंशाने वाढून 20 अंश सेल्सिअसवर जाण्याची शक्‍यता आहे.