कार पार्किंग लिफ्टची टेस्टिंग ; गाडीसह लिफ्ट कोसळल्याने 4 कामगार जखमी

डोंबिवली - कार पार्किंग लिफ्टची टेस्टिंग सुरू असतानाच दुर्घटना घडून गाडीसह लिफ्ट खाली कोसळल्याची घटना कल्याण पश्चिमेतील अहिल्याबाई चौक परिसरात घडली. या दुर्घटनेत 3 कामगार गंभीर जखमी, तर 1 जण किरकोळ जखमी असून त्यांच्यावर खासगी रुग्णालयात उपचार सुरू आहेत. कल्याण पश्चिम अहिल्याबाई चौकात पुण्य द स्काय लॉन्च ही 23 मजली इमारत आहे. या इमारतीत चार मजली पार्किंग उभारण्यात आले आहे.

या पार्किंग मधील लिफ्टची सोमवारी सायंकाळी टेस्टिंग सुरू होती. तळ मजल्यावरून गाडी लिफ्ट मध्ये चढवून लिफ्ट वर जात असतानाच अचानक काही बिघाड झाल्याने लिफ्ट खाली कोसळली. यावेळी काम करत असलेले 4 कामगार जखमी झाले. लिफ्ट कोसळल्यानंतर जोरदार आवाज झाल्याने स्थानिक नागरिकांनी धाव घेत कामगारांना बाहेर काढत त्यांना त्वरित रुग्णालयात उपचारासाठी पाठविले. बाजारपेठ पोलीस ठाण्याचे पोलीस व अग्निशमन दलाचे कर्मचारी घटनास्थळी दाखल झाले आहे. हा अपघात कसा घडला याविषयी पोलिस अधिक तपास करीत आहेत.