रसायनीत मेंढपाळाची फरफट

रसायनीत मेंढपाळाची फरफट चाऱ्याच्या तुटवड्यामुळे भटकंती; रात्रीचा तळ बसवणेही कठीण रसायनी, ता. ८ (बातमीदार) : रसायनी परिसरात घाटमाथ्यावरील चाऱ्याच्या शोधात आलेल्या मेंढपाळ आलेले आहेत. सद्यस्थितीत मेंढपाळ्यांच्या कळपांना चाऱ्याचा तुटवडा भासत असल्याने ते चाऱ्याच्या शोधात भटकत आहेत. तसेच, रात्री तळ बसवताना मिळणाऱ्या उत्पादनासही मेंढपाळांना अनेकदा मुकावे लागत आहे. त्यामुळे ते हताश होत आहे. घाटमाथ्यावर चारा टंचाईमुळे पुणे, सातारा, अहमदनगर जिल्ह्यातील मेंढपाळ आपल्या कळपासह चाऱ्याच्या शोधात दरवर्षी कोकणात येतात. साधारण दसरा, दिवाळीनंतर कळप बोरघाट उतरून रायगड जिल्ह्यातील खालापूर तालुक्यात येतात. सध्या अनेक शेतात दुबार कडधान्ये, भात, भाजीपाला पीक आहे. याशिवाय, पाताळगंगा एमआयडीसीच्या जागेत औद्योगिक विकास होऊ लागला आहे. अनेक ठिकाणी बांधकाम व्यावसायिकांचे गृहप्रकल्प सुरू आहेत. त्यामुळे मोकळ्या जमिनी अडकून गेल्या आहेत. तर दुसरीकडे वन विभागाने रानात जनावरांना चारण्यासाठी बंदी घातली आहे. अशा कारणांमुळे कळपांना मुबलक चारा मिळत नाही. त्यामुळे चाऱ्याच्या शोधात भटकावे लागत आहे, असे मेंढपाळांनी सांगितले. शेतकऱ्यांकडून चारा, पैसे किंवा धान्य घेऊन रात्री तळ बसवला जातो. मात्र, आता या उत्पादनासही मेंढपाळांना मुकावे लागत आहे. त्यामुळे मेंढपाळ हवालदिल होत आहे. ------------------- रसायनी परिसरात बांधकाम वाढत चालली आहे. कळपांना पूर्वीसारखी चारण्यासाठी जागा राहिली नाही. शेतात हिवाळी पीक असल्याने चाऱ्यासाठी फिरावे लागत आहे. रात्री तळ बसवण्यासाठी शेतकऱ्यांकडून मागणी झाली नाही, तर मोकळ्या जागेत तळ बसवतो. - अर्जुन दगडे, जि. अहमदनगर, ता. कर्जत सिंचनाद्वारे अनेक शेतकऱ्यांनी दुबार भात आणि भाजीपाल्याचे पीक घेतले आहे. आधार नसलेल्या शेतकऱ्यांनी जास्त करून वाल आणि मूग, मटकी, चवळी आदी कडधान्यांचे पीक घेतले आहे. पीक काढल्यानंतर मेंढ्यांना चारण्यासाठी साधारण एक महिन्यानंतर मोकळे शेत होतील. - सुदाम कडपे, कृषीमित्र