वडगाव पंचायतीच्या आवारात सांडपाण्याची गळती

वडगाव मावळ, ता. ११ : येथील पंचायत समिती आवारामधील जिल्हा परिषद प्राथमिक शाळेसमोर सांडपाण्याची गळती असल्याने विद्यार्थ्यांना अपघात होण्याची शक्यता आहे. प्रशासनाने याची दखल घेऊन त्वरित दुरुस्ती करावी अशी मागणी भाजपचे शहराध्यक्ष अनंता कुडे यांनी केली आहे. शाळेच्या आवारात नगरसेवक प्रसाद पिंगळे यांनी स्व. केशवराव वाडेकर बाल उद्यान उभारले असून, शाळेच्या मधल्या सुटीत विद्यार्थी तेथे खेळतात. उद्यानाशेजारील सांडपाणी वाहिनीतून गळती असल्याने तेथे शेवाळ तयार झाले आहे. मुले खेळत असताना तेथे पाय घसरून पडण्याची शक्यता आहे. विद्यार्थ्यांची सुरक्षितता लक्षात घेऊन सांडपाण्याची गळती त्वरित दुरुस्त करावी, अशी मागणी कुडे यांनी केली आहे.