रमेश कदम पोलिसांना अपशब्द वापरल्याच्या आरोपातून दोषमुक्त

मुंबई, ता. ७ : अण्णा भाऊ साठे आर्थिक विकास महामंडळात गैरव्यवहार केल्याचा आरोप असलेले राष्ट्रवादी काँग्रेसचे माजी आमदार रमेश कदम यांना पोलिसांना अपशब्द बोलल्याच्या आरोपातून सत्र न्यायालयाने दोषमुक्त केले. आर्थर रोड कारागृहात कर्तव्यावर असलेल्या पोलिसाला शिवीगाळ करत असल्याची त्यांची एक व्हिडिओ क्लिप वायरल झाली होती. दुसऱ्या कारागृह सेलमध्ये जाण्यावरून त्यांची पोलिसांबरोबर बाचाबाची झाली. त्यामुळे सरकारी कामात अडथळा आणल्याचा गुन्हा पोलिसांनी दाखल केला होता. याबाबत नागपाडा पोलिस ठाण्यात गुन्हा दाखल करण्यात आला होता; परंतु पोलिसांनी मला जातीवाचक अपशब्द सुनावले आणि लाच मागितली, असा प्रतिआरोप त्यांनी केला होता. कदम यांच्यावरील आरोप सिद्ध झाले नाही असे नमूद करून न्यायालयाने त्यांना दोषमुक्त जाहीर केले. महामंडळ गैरव्यवहार प्रकरणात कदम मागील काही वर्षे कारागृहात आहेत. २०१५ मध्ये पोलिसांनी त्यांच्यावर कारवाई केली होती.