रायगड : महसूल कर्मचारी उद्यापासून बेमुदत संपावर; जिल्ह्यातील कामकाज ठप्प होणार ?

महाड : दोन वर्षांपासून पाठपुरावा करूनही न्याय मिळत नसल्याने रायगड (Raigad) जिल्ह्यातील शेकडो महसूल कर्मचारी सोमवारपासून बेमुदत संपावर (indefinite strike) जाणार आहेत. यामुळे जिल्ह्यातील महसूल विभागातील (Revenue department employee) कामकाज ठप्प होण्याची शक्यता वर्तविण्यात येते.राज्यातील महसूल विभाग आणि जिल्ह्यातील महसूल संघटनांनी २१ मार्च २०२२ पासून निदर्शने, काळ्या फिती लावून काम, एक दिवसाचा लाक्षणिक संप अशी आंदोलने केली आहेत.

तरीही सरकार त्यांच्या मागण्यांकडे दुर्लक्ष करत आहे. यामुळे आता महसूल कर्मचाऱ्यांनी बेमुदत संपावर जाण्याचे हत्यार उपसले आहे. तहसील कार्यालय, उपविभाग व जिल्हाधिकारी कार्यालयात महसूल सहायकांची पदे मोठ्या प्रमाणावर रिक्त असून महसूल सहायक भरतीसाठी राज्य सरकारकडे वारंवार पाठपुरावा करून देखील भरती करण्यास टाळाटाळ करण्यात येत आहे. यामुळे एका कर्मचाऱ्याला दोन ते तीन कर्मचाऱ्यांचे काम करावे लागत असल्याने त्यांच्यावर कामाचा ताण येत आहे.

शासन निर्णय महसूल व वन विभाग १० मे २०२१ अन्वये नायब तहसीलदार संवर्ग म्हणून घोषित करण्यात आलेला आहे. त्यानुसार सर्व अव्वल कारकून व मंडळ अधिकारी यांची सेवा ज्येष्ठता याद्या राज्य स्तरावर एकत्रित करण्याबाबत पत्र काढलेले आहे; परंतु अव्वल कारकून व मंडळ अधिकारी हा जिल्हास्तरीय संवर्ग असल्यामुळे त्यांच्या याद्या या राज्यस्तरावर एकत्रित करण्याची प्रक्रिया ही अन्यायकारक असल्याने पत्र तात्काळ रद्द करावे, अशीही संघटनेची मागणी आहे. इतर मागण्यांबाबत सराकारकडे वारंवार पाठपुरावा करूनही फक्त आश्‍वासन मिळत असून त्यांची पूर्तता होत नसल्याने संपात महाड उपविभागातील कर्मचारी मोठ्या ताकदीने सहभागी होणार असल्याचे महाड उपविभाग अध्यक्ष आर. डी. भोसले यांनी सांगितले.