कर्जत स्थानकात डब्यांची स्थिती दर्शविणारे फलक

कर्जत, ता. २४ (बातमीदार) : येथील रेल्वेस्थानकात डब्यांची स्थिती दर्शविणारे फलक बसविण्याची मागणी सामाजिक कार्यकर्ते पंकज ओसवाल यांनी केली होती. त्यांच्या या मागणीला अखेर यश आले आहे. स्थानकातील फलाट क्रमांक एकवर सध्या डब्यांची स्थिती दर्शविणारे फलक बसविण्यात आले आहेत.
डब्यांची स्थिती दर्शविणारे फलक नसल्याने कर्जत स्थानकातून गाडी पकडण्यासाठी येणाऱ्या प्रवाशांची मोठी गैरसोय होते. पंकज ओसवाल यांनी गेल्या दोन वर्षांपासून यासाठी रेल्वे प्रशासनाकडे पाठपुरावा केला. त्यावेळी कर्जत रेल्वेस्थानकावर एक्स्प्रेस गाड्याच्या डब्यांची स्थिती दर्शविणाऱ्या छोट्या फलकांची गरजच नाही, असे कळविले होते. ओसवाल यांनी त्यानंतरही पाठपुरावा करून फलकांचे महत्त्व स्पष्ट केले. अखेर रेल्वे प्रशासनाने अशा फलकांना मंजुरी दिली. त्यानुसार स्थानकावर फलाट क्रमांक एकवर फलक बसवले. लवकरच फलाट क्रमांक दोनवरसुद्धा असे फलक बसवण्याचे काम सुरू आहे.