कंपनी अधिकाऱ्याला माजी कामगारांकडून धमकी

कंपनी अधिकाऱ्याला माजी कामगारांकडून धमकी रोहा (बातमीदार) : धाटाव एमआयडीसीतील बेव्हरेज लिमिटेड कंपनीतील अधिकारी सौरभ कपूर यांना कंपनीच्या आत जाण्यासाठी माजी १० कामगारांनी अटकाव केला. त्यानंतर त्यांना शिवीगाळ व मारण्याची धमकी दिली. याप्रकरणी कामगारांविरोधात गुन्हा दाखल करण्यात आला आहे. सौरभ कपूर हे आपल्या सहकाऱ्यांसह २७ डिसेंबरला दुपारी १२:३० वाजता बेव्हरेज लिमिटेड या कंपनीत जात होते. त्याच वेळी लीलाधर मोरे, रामचंद्र कडव, वामन मोरे, महेश जोशी, अमित भायदे, वीरेंद्र वारंगे, दत्तात्रेय मोरे, विजय वारंगे, अनिल वारंगे, तुकाराम रटाटे यांनी त्यांना कंपनीच्या आता जाण्यासाठी अडवणूक केली. त्यानंतर त्यांना शिवीगाळ करून मारण्याची धमकी दिली. या सर्व १० जणांविरुद्ध रोहा पोलिस ठाण्यात तक्रार दाखल करण्यात आली आहे. याप्रकरणी पोलिस निरीक्षक संजय पाटील यांच्या मार्गदर्शनाखाली सहायक फौजदार डी. जे. म्हशीलकर पुढील तपास करत आहेत.