दुकानदाराकडून १५ हजारांची लाच स्विकारताना अटक

लाच स्वीकारताना महावितरणचे दोघे जाळ्यात उल्हासनगर, ता. १४ (वार्ताहर) : व्यावसायिक वीज मीटरवर ४० हजार रुपयांचा दंड ठोठावल्याने त्यावरील कारवाई टाळण्यासाठी व दंडाची रक्कम पुढील बिलात न लावण्यासाठी १५ हजार रुपयांची लाच स्वीकारताना उल्हासनगरमधील महावितरणच्या दोघांना लाचलुचपत प्रतिबंधक विभागाने अटक केली आहे. कॅम्प नंबर एकमध्ये रंगीला आइस्क्रीम ॲण्ड जनरल स्टोअर्सच्या तक्रारदार मालकाचे घरवजा दुकान आहे. दुकानासाठी व्यावसायिक, तर घरासाठी घरगुती मीटर आहेत. महावितरणच्या उपविभाग एकमध्ये कार्यरत असिस्टंट अकाउंटर सचिन जाधव आणि मीटर रीडर तुषार वायकर यांनी तक्रारदाराकडे व्यावसायिक मीटरवरील ४० हजार रुपयांचा दंड टाळण्यासाठी आणि पुढील बिलात ही रक्कम न लावण्यासाठी १५ हजार रुपयांची लाच मागितली होती. त्यानुसार आज (ता. १४) पैसे देण्यात येणार होते. या प्रकरणी ठाणे लाचलुचपत विभागाकडे तक्रार केली होती. पोलिस निरीक्षक पल्लवी ढगे-पाटील यांनी सापळा रचून सचिन जाधव, तुषार वायकर यांना अटक केली. दोघांच्याही घरांची झाडाझडती करण्यास सुरुवात करण्यात आली होती.